Тайланд-Камбоджа чек арасындагы кайрадан башталган кагылышуулар шаршемби күнү 11-күнүнө кирди. 7-декабрда кагылышуулар кайрадан күчөгөндөн бери эки тараптан кеминде 52 адам каза болду.
Khmer Times гезитинин маалыматы боюнча, Камбоджанын Коргоо министрлиги шаршемби күнү Таиланд армиясынын чек ара аймагында артиллериялык жана дрондук соккуларды жасаганын билдирди.
Министрлик ошондой эле Камбоджа күчтөрүнүн Таиланддын позицияларына BM-21 ракеталары менен жооп кайтарганын жарыялады.
Мамлекеттик Thai PBS телеканалынын маалыматы боюнча, бул окуялар Таиланд аскерлери катуу салгылашуулардан кийин Чонг Ань Ма аймагын басып алгандан кийин болгон.
Ок атышууну токтотуу талаптары
Тайланд шейшемби күнү эки тараптан тең 700 миңден ашуун адамдын жер которушуна алып келген кандуу кагылышууларды токтотуу үчүн биринчи болуп ок атышууну токтотууну жарыялаган тарап Камбоджа болушу керектигин билдирди.
Тайланддын тышкы иштер министрлигинин басма сөз катчысы Маратее Налита Андамо ок атышууну токтотуунун белгилүү шарттарга жооп бериши жана ишенимдүү болушу керектигин белгилеп, Камбоджаны чыр-чатакты токтотуу үчүн "чек ара боюндагы миналарды тазалоо иштеринде чын жүрөктөн кызматташууга" чакырды.
Тайланд бийлигинин маалыматы боюнча, азырынча 19 тай жоокери жана 16 жай тургун каза болгон. Бирок, Камбоджанын Ички иштер министрлиги 17 жай тургун каза болуп, 77си жаракат алганын билдирди.
Тынчтык келишими ишке ашпай калды
Кагылышуулар АКШнын президенти Дональд Трамптын жума күнү Таиланд жана Камбоджанын лидерлери кайрадан башталган кагылышууларды токтотууга макул болушканын айтканына карабастан улантылды.
Эки өлкө октябрь айында Куала-Лумпурда Трамп менен Малайзиянын премьер-министри Анвар Ибрахимдин катышуусунда тынчтык келишимине кол коюшкан, бирок кийинчерээк чек ара провинциясындагы минанын жарылышында таиланддык аскерлердин оор жаракат алышы менен келишим токтотулду.
Таиланд бийлиги ошондой эле акыркы беш айдагы окуялардан кийин болжол менен 18 камбоджалык аскердин Таиланд тарабынан камакка алынгандыгын билдирди.
Тайланд менен Камбоджанын ортосундагы көптөн бери келе жаткан чек ара талашы маал-маалы менен зомбулукка айланып, июль айындагы кагылышууларда кеминде 48 адам каза болду.
