Венесуэланын президенти Николас Мадуро он күн мурун АКШнын президенти Дональд Трамп менен Латын Америкасындагы америкалык аскерлердин көбөйүшү боюнча "чын ыкластуу" телефондук сүйлөшүү өткөргөнүн ырастады.
Шаршемби күнү мамлекеттик телеканалга берген маегинде Мадуро: "Мен АКШнын президенти Дональд Трамп менен сүйлөштүм. Сүйлөшүү урмат-сыйга негизделген, ал тургай чын ыкластуу өттү деп айта алам. Эгерде бул сүйлөшүү мамлекеттердин, өлкөлөрдүн ортосундагы чын ыкластуу диалогго карай кадамдарды жасоону билдирсе, анда биз диалогду жана дипломатияны кубаттайбыз, анткени биз ар дайым тынчтыкты көздөйбүз", - деди.
Август айынан бери АКШ баңгизат аткезчилигине каршы күрөшүү үчүн Кариб деңизине согуштук кемелер флотун жана дүйнөдөгү эң ири учак ташуучу кемени жайгаштырып, кеминде 22 кемеге сокку урду жана операция 83 адамдын өмүрүн алды.
Бирок Мадуро бул операция анын солчул өкмөтүн кулатууга жана акыры өлкөнүн ири мунай запастарын басып алууга багытталганын айтты.
Трамп жекшемби күнү Мадуро менен телефон аркылуу сүйлөшкөнүн ырастады, бирок кененирээк маалымат берген жок. Президент Трамп: "Жакшы же жаман өттү деп айта албайм. Бул телефондук сүйлөшүү эле", - деп жооп берди.
Вашингтон Мадурону "Күн картелинин" лидери деп айыптап, бул түзүлүштү 24-ноябрда террористтик уюм деп жарыялаган. Ошондой эле Мадурону кармоого жардам берген маалымат үчүн 50 миллион доллар сыйлык сунушталганы кабарланган.
