Венесуэланын президенти Николас Мадуро эгерде АКШ кол салса, өлкөсү "куралдуу күрөшкө" даяр экенин билдирди. Ал 2,5 миллион аскер жана согушкер мүчөлөрүн мобилизациялоону жарыялады.
"Бүгүн Венесуэла улуттук күчкө көбүрөөк ээ, биримдикте жана көз карандысыздыгын сактап, тынчтыкты курууга кандай гана шарт болбосун даяр. Эгерде куралдуу күрөшкө кайрылууга туура келсе, биз даярбыз,",-деди Мадуро телекөрсөтүү аркылуу кайрылуусунда.
Ал Вашингтонду аскердик жаңжал чыгарууга аракет кылып, басып кирүүгө шылтоо издеп жатат деп айыптады.
"Алар аскердик инцидентти издеп жатышкан. Биз провокацияларга алдырган жокпуз жана алдырбайбыз,"- деди ал.
Мадуро баңгизат соодасы боюнча айыптоолор анын өкмөтүн кулатуу аракеттеринин беткабы экенин айтып: "Баары баңгизат жана баңгизат соодасы тууралуу окуялар жөн гана кутум экенин билишет. Бул алардын жүйөсү. Алар режимди өзгөртүп, өлкөнүн байлыктарын тартып алууну каалашат жана мунай запастарын көзөмөлдөөнү көздөшөт,"-деди.
Ал Кариб деңизин "ок-дарылар жана ракеталар" менен толтуруу чоң жаңжалга алып келиши мүмкүн экенин эскертти.
Мадуро:"АКШ жана бүт дүйнө. Бул Венесуэланы коркутуу, режимди өзгөртүү, өлкөнү туруксуздаштыруу жана биздин мунай, газ, темир жана алтынды тартып алуу үчүн жүргүзүлүп жаткан аскердик операция экенин билишет,"- деди.
Мадуро Вашингтон менен мамилеси АКШнын деңиз күчтөрүн жайгаштыргандан кийин бузулганын айтты. "Биздин АКШ өкмөтү менен эки канал боюнча байланышыбыз ошол учурда бузулган"-деди.
"Бүгүн мен бардыгына алар байланышты бомба коркутуулары, өлүм менен коркутуулар жана шантаж менен жок кылганын жарыялай алам", - деп кошумчалады ал.
Ал ошондой эле АКШнын мамлекеттик катчысы Марко Рубиону "өлүм менен согуштун чебери" деп айыптады.
Мадуронун билдирүүлөрүнөн бир нече саат өткөндөн кийин, америкалык аскерлер 2-сентябрда 11 адамдын өмүрүн алган кол салуудан кийин Венесуэладан баңгизат ташыган делген дагы бир кайыкка кол салып, үч киши каза болгону кабарланган.
Июль айында Ак үй "Картел де лос Солес" (Күндөрдүн Картели) деп аталган уюмду Венесуэланын расмий адамдары менен байланышы бар деген жүйө менен террордук уюм деп жарыялагандан бери чыңалуу күчөдү.
АКШ ошондой эле Мадуронун кармалышы үчүн 50 миллион доллар сыйлык сунуштады жана баңгизатка каршы операцияларынын алкагында Кариб деңизине согуш кемелерин жайгаштырды.
