АКШнын президенти Дональд Трамп Орусиянын президенти Владимир Путинге нааразычылыгын билдирип, Украинага Patriot абадан коргонуу ракеталарын жөнөтө тургандарын жарыялады.
Трамп жекшемби күнү Мэриленд штатындагы Эндрюс биргелешкен базасында журналисттерге: «Европа Биримдиги мунун баасын төлөп жатат. Биз эч нерсе төлөбөйбүз, бирок жөнөтөбүз. Бул биз үчүн соода болот жана биз аларга абдан керек болгон Патриот ракеталарын жөнөтөбүз»,-деди. Трамп жөнөтүлө турган Patriot ракеталык системаларынын санын тактаган жок.
АКШ лидери Орусиянын президенти Путиндин позициясын сындап: «Путин чындап эле көп адамдарды таң калтырды. Ал жакшы сүйлөйт, бирок кечинде баарын бомбалайт. Бирок бир кичинекей көйгөй бар: бул мага жакпайт»,-деди.
Трамп НАТОнун баш катчысы Марк Рютте менен жолугаарын билдирди. Рютте дүйшөмбү күнү Вашингтонго эки күндүк сапарын баштап, анда мамлекеттик катчы Марко Рубио, коргоо министри Пит Хегсет жана Конгресстин мүчөлөрү менен жолугушат.
Дүйшөмбү күнү Орусияга каршы санкцияларды жарыялайбы деген суроого Трамп: «Эртең эмне болорун көрөбүз»,-деп жооп берди.
Сенаторлор Линдси Грэм жана Ричард Блументал 2025-жылдын 1-апрелинде Орусиядан мунай, газ, уран жана башка өнүмдөрдү сатып алган өлкөлөрдөн импорттолуучу товарларга 500% бажы төлөмүн киргизүүнү караган Орусияга санкциялар мыйзамын киргизишти.
Трамп өткөн бейшембиде Орусия боюнча дүйшөмбү күнү «чоң билдирүү» жасай турганын айткан, бирок чоо-жайын айткан жок.
