Франциядагы студенттердин нааразычылык акциялары өлкөнү баш аламандыкка кептеди.
Францияда он жылдан бери чечилбей келе жаткан кадр тартыштыгына жана билим берүү шарттарынын начардыгына каршы студенттер баштаган нааразычылык акциялары жалпы улуттук кризиске айланды. Мектептердин инфраструктурасы начар абалда, ал эми мугалимдердин айлык акысы минималдуу эмгек акынын деңгээлинде.
Сентябрь айынын ортосунда Париждеги орто мектептердин биринде башталган нааразычылык акциялары кыска убакытта жалпы улуттук кыймылга айланды. Ички иштер министрлигинин маалыматына караганда, шейшемби күнү өлкө боюнча 250 миңден ашуун адам нааразылык акцияларына чыкты.
Ал эми уюштуруучулар катышуучулардын саны 450 миңге жеткенин билдиришти.
Кызмат мөөнөтү толуп жаткан президент Эммануэль Макрон үчүн жаңы сыноого айланган бул кризис премьер-министр Себастьян Лекорнуну айдын аягына чейин жаңы чараларды жарыялоого түрттү.
Студенттер өз талаптарын билдирүү үчүн түзгөн платформага буга чейин 40 миңден ашуун арыз келип түшкөн.
Мектептердин инфраструктурасы кыйроо алдында
Окуучулар имараттардын эскиргенине, инфраструктуранын бузулганына, жылуулуктун жоктугуна жана зыянкечтер каптаганына каршы нааразылык акцияларына чыгышууда. Кесиптик бирликтин (профсоюздун) маалыматы боюнча, мектептердин жарымынан көбүндө кызматкерлер жетишсиз.
Мугалимдердин тартыштыгынан улам жүздөгөн саат сабактар өтүлбөй калууда, ал эми класстарда окуучулардын саны 30га чейин жетип, нааразылыкты ого бетер күчөтүүдө.
Мугалимдердин айлык акысы минималдуу эмгек акы деңгээлинде
Калктын өсүшүнө туруштук бере албай жаткан билим берүү системасында мугалимдердин айлыгы минималдуу эмгек акынын деңгээлине чейин төмөндөп, кесипке болгон кызыгууну азайтты.
Иль-де-Франс аймагы өлкө боюнча билим берүүгө эң аз каражат бөлгөн регион катары өзгөчөлөнөт. Нааразычылык акциясынын катышуучулары мугалимдерди жана медициналык кызматкерлерди тез арада жумушка алууну, ошондой эле мектеп имараттарын чукул арада оңдоп-түзөөнү талап кылышууда.
Пропорциясыз күч колдонуу нааразылык жаратты
Өткөн айдан бери жүздөгөн мектептин кире бериштери тосулуп, нааразычылык акциялары кагылышуулар менен коштолду. Полициянын кийлигишүүсү учурунда көздөн жаш агызуучу газ жана резина октор колдонулуп, 200дөн ашуун адам жаракат алды.
Социалдык баш - аламандыкка байланыштуу тынчсыздануулар
Нааразычылык акциясына катышкандардын көпчүлүгү 18 жашка чыга электер болгонуна карабастан, ата-энелердин, мугалимдердин жана активисттердин колдоосу менен күчөп жаткан кыймыл өкмөттү олуттуу тынчсыздандырууда.
Француз бийлиги жаштар баштаган бул нааразычылык Макрондун администрациясына каршы он жылдан бери топтолуп келген нааразычылык менен биригип, кеңири масштабдагы социалдык көтөрүлүшкө айланып кетиши мүмкүн экендигинен кооптонуулар болууда.
