Кыргыз Республикасынын Президенти Садыр Жапаров туруктуу жана гүлдөгөн Борбордук Азия аймак элдеринин гана эмес, эл аралык өнөктөштөрдүн да кызыкчылыктарына кызмат кылаарын билдирди.
Кыргыстандын президентинин басма сөз борборунун жазуу жүзүндөгү билдирүүсүнө ылайык, Жапаров Түштүк Кореянын борбору Сеулда өткөн Борбордук Азия-Корея Республикасы саммитинде сөз сүйлөдү.
Саммит кызматташууда жаңы бап ачканын белгилеген Жапаров: «Туруктуу жана гүлдөгөн Борбордук Азия аймак элдеринин гана эмес, эл аралык өнөктөштөрдүн да кызыкчылыктарына кызмат кылат», - деди.
Ал акыркы жылдары Борбордук Азия динамикалуу, гармониялуу жана экономикалык жактан өз ара байланышкан аймакка айланганын жана аймакта кеңири масштабдуу трансформация болуп жатканын белгиледи.
Жапаров бул процесстер өз ара ишенимге жана жалпы узак мөөнөттүү кызыкчылыктарга негизделгенин жана саммитте кабыл алына турган Сеул декларациясы алдыдагы жылдарга карата конкреттүү долбоорлорду камтыган практикалык иш-аракеттер программасынын негизин түзөрүн билдирди.
Түштүк Кореяны Борбордук Азия үчүн ишенимдүү өнөктөш катары сыпаттаган Садыр Жапаров, соода, инвестиция, транспорт, энергетика, санариптештирүү жана билим берүү тармактарындагы өз ара пайдалуу долбоорлорду белгилеп, азыркы этаптагы эң маанилүү милдет өлкөлөрдүн ортосундагы жогорку саясий ишенимди узак мөөнөттүү экономикалык жана технологиялык өнөктөштүк деңгээлине көтөрүү экенин баса белгиледи.
«Борбордук Азия - Корея Республикасы» лидерлеринин саммити өнөктөштүк, тынчтык, гүлдөп-өнүгүү жана гуманитардык жардам боюнча негизги көз карашты белгилеп, мамилелерди стратегиялык деңгээлге көтөргөн 28 пункттан турган «Сеул декларациясына» кол коюу менен аяктады.
Экинчи саммитти Казакстан 2028-жылы өткөрө турганы жарыяланды.
Түштүк Кореянын президенти Ли Чжэ Мён өткөргөн саммитке Кыргызстандын президенти Садыр Жапаров, Казакстандын президенти Касым-Жомарт Токаев, Өзбекстандын президенти Шавкат Мирзиёев, Тажикстандын президенти Эмомали Рахмон жана Түркмөнстандын президенти Сердар Бердымухамедов катышты.
