БУУнун Коопсуздук Кеңешинин мүчөлөрү АКШны сынга алышты, анткени ал Газа тилкесинде ок атышууну токтотуу жана гуманитардык жардамга чектөөсүз кирүү боюнча резолюцияны вето кылды. Вашингтон бул кадам учурдагы дипломатиялык аракеттерге тоскоолдук кылат деп билдирди.
Бул 15 мүчөлүү орган тарабынан ноябрь айынан бери Газа боюнча биринчи добуш берүү болду. Ошол учурда да АКШ, Израилдин негизги союздашы катары, кан төгүүнү токтотуу чакырыгын камтыган текстти да бөгөттөгөн.
АКШнын БУУдагы элчиси Дороти Ши шаршемби күнү 14 каршы добуш 1 макул добуш менен өткөн добуш берүүдөн мурун: "Бул резолюция жердеги реалдуулуктарды чагылдырган ок атышууну токтотуу боюнча дипломатиялык аракеттерге тоскоолдук кылып, ХАМАСты күчтөндүрөт", - деп билдирди.
Резолюция долбоору "Газада бардык тараптар тарабынан урматталган, дароо, шартсыз жана туруктуу ок атышууну токтотууну" талап кылган.
Ошондой эле, "ХАМАС жана башка топтор тарабынан кармалып турган бардык туткундарды дароо, урмат менен жана шартсыз бошотууга" чакырган.
Палестина аймактарындагы "катастрофалык гуманитардык абалды" баса белгилеген резолюция, эгер кабыл алынган болсо, Газага гуманитардык жардам көрсөтүүгө коюлган бардык чектөөлөрдү алып салууну талап кылмак.
Пакистан БУУдагы элчиси Асим Ахмад: "Бул кеңештин абийирине гана эмес, саясий жоопкерчилигине да кара так болуп калат жана муундар бою жаңырып турат", - деп билдирди.
Кытайдын БУУдагы элчиси Фу Конг: "Бүгүнкү добуш берүүнүн жыйынтыгы дагы бир жолу кеңештин Газадагы жаңжалды токтото албаганынын негизги себеби АКШнын кайталанган тоскоолдуктары экенин көрсөттү", - деп айтты.
Палестиналык каршылык көрсөтүүчү ХАМАС кыймылы да Вашингтондун ветосуна сереп салып, бул Израилдин премьер-министри Бенямин Нетаньяхунун Газадагы геноцидди улантуусуна жашыл жарык берет деп билдирди.
Бул вето АКШнын президенти Дональд Трамп кызматка киришкенден бери Вашингтондун биринчи мындай кадамы болуп калды.
“Жетишет!”
Франция да Вашингтонду сынга алып, вето Кеңештин "жоопкерчиликти өз мойнуна алуусуна" тоскоолдук кылганын айтты.
Франциянын БУУдагы элчиси Жером Боннафонт: "Кеңеш жоопкерчиликти өз мойнуна ала алган жок, бирок көпчүлүгүбүз бир пикирге келгендей болдук", - деп билдирди.
Долбоорду сунуштаган Словения да АКШны сынга алды.
Словениянын БУУдагы элчиси Самуэл Збогар: "Жетишет! Биздин максатыбыз вето коюу эмес болчу", - деп билдирди.
Ал АКШны атын атабастан, вето аларга чара көрүүгө тоскоолдук кылганын айтты.
Палестинанын БУУдагы элчиси Рияд Мансур шейшемби күнү Кеңешти чара көрүүгө чакырган.
"Ар бирибиз тарых тарабынан палестиналык элге каршы кылынган бул кылмышты токтотуу үчүн канчалык аракет кылганыбыз боюнча бааланабыз", - деди ал.
Израилдин БУУдагы элчиси Дэнни Данон текстке каршы чыгып: "Добуш берилген резолюция ХАМАС үчүн белек болуп, терроризмди күчтөндүрүү коркунучун жаратмак", - деди.
"АКШга туура тарапта турганы үчүн ыраазычылык билдиребиз”,-деди ал.
АКШ 2023-жылдын октябрында, 2023-жылдын декабрында, 2024-жылдын февралында жана 2024-жылдын ноябрында резолюцияларды вето кылып, башка долбоорлор боюнча добуш бербей карманган.
