Түркиянын Бириккен Улуттар Уюмундагы кеңешчиси Гүлшах Жумуржу Кадер эл аралык коомчулук “геноцидге барабар оор мыкаачылыктарга” күбө болуп жатканын айтып, Газадагы абал мындай оор эл аралык кылмыштардын кайталанышынын алдын алуу зарылдыгын эскертип турганын билдирди.
Кадер: "Экинчи Дүйнөлүк согуштан жана Холокосттон кийин берилген "кайра эч качан" деген убада жалпы абийирде сакталып калганына карабастан эл аралык коомчулук бүгүн да геноцидге барабар мыкаачылыктарга күбө болууда", - деди.
Кадер бул сөздөрдү Геноцид кылмышынын курмандыктарын эскерүү жана кадыр-барктын эл аралык күнүнүн 10 жылдыгына карата БУУнун Башкы Ассамблеясында өткөн сессияда айтты.
Газанын "эскертүүчү жана ойготуучу" экенин айткан Кадер "өтмүштүн кайгылуу сабактары бүгүнкү күндүн аракеттерине жол көрсөтүшү керек" деп маалымдады.
Эл аралык укук негизги принцип болушу керектигин билдирген Кадер, тар юридикалык термин катары аныкталган "геноцид" сөзү да ички саясий максаттарда эл аралык укукка жана компетенттүү соттордун чечимдерине карама-каршы келген жолдор менен колдонулбашы керектигин баса белгиледи.
Түркиянын өкүлү мамлекеттерди бул терминди саясий максаттарда колдонуудан алыс болууга чакырды жана дүйнөдө "расизм, ксенофобия, исламофобия, басмырлоо жана башкаларга карата жөнөкөй чыдамсыздык" сыяктуу күчөп жаткан тенденциялар жөнүндө эскертти.
"Газада күбө болгондой, эл аралык укукту одоно бузуулар үчүн жазасыздык болбошу керек", - деген Кадер жоопкерчилик мындай кырдаалдардын алдын алууда маанилүү ролду ойной турганын кошумчалады.
Кадер ошондой эле "эрте эскертүү сигналдарынын" маанисине көңүл буруп, БУУ системасындагы күчтүү координация "кайра эч качан" деген убаданы аткаруу үчүн абдан маанилүү экенин баса белгиледи.
