АКШ президенти Дональд Трамп Миннеаполис шаарында бир аялдын Миграция жана бажы кызматынын (ICE) агенти тарабынан өлтүрүлүшү "өзүн-өзү коргоо" (мыйзамдуу коргонуу) сыяктуу көрүнгөнүн айтты. Бирок жергиликтүү жана штаттык бийлик өкүлдөрү бул билдирүүнү четке кагып, окуяны тыкыр иликтөөгө чакырышты.
Трамп Truth Social тармагындагы баракчасында айдоочу аял "ICE кызматкерин атайылап, аёосуз жана мыкаачылык менен тебелеп кеткенин" жана агенттин "өзүн коргоо үчүн ок аткандай көрүнгөндүгүн" билдирди.
Федералдык кызматкерлер окуянын шаршемби күнү патрулдук операция учурунда болгонун билдиришти.
Ички коопсуздук департаменти 37 жаштагы аял унаасы менен кызматкерлерди тебелөөгө аракет кылганын, натыйжада агенттин ок атканын билдирди.
Ички коопсуздук катчысы Кристи Ноем ICE агентинин "тез жана коргонуу максатында кыймыл кылганын", аялдын атылганын жана андан кийин каза болгонун айтты.
Бирок, Миннеаполистин мэри Джейкоб Фрей бул билдирүүнү четке кагып, окуянын видеотасмаларын карап чыгып, атышуу акталбаган деп эсептегенин айтты.
Күч колдонууну этиятсыздык деп мүнөздөгөн Фрей федералдык миграция агенттеринен шаардан чыгып кетүүнү талап кылды.
«Биз ICE кызматкерлеринин шаардан тезинен чыгып кетишин талап кылабыз. Биз мигранттар жана качкындар коомчулугубузду колдойбуз»,- деди Фрей.
Миннесота штатынын губернатору Тим Уолз мэрдин тынчсыздануусун кайталап, коомчулукту Ички коопсуздук департаментинин «пропаганда машинасына» каршы эскертти.
Уолз штаттын «толук, адилеттүү жана тез иликтөө» жүргүзөрүн айтты.
Уолз айрыкча Миннесота Улуттук гвардиясын штатка жайгаштырууга даярдануу үчүн эскертүү буйругун чыгарганын билдирди.
