Түркиялык ЛОР (кулак, мурун жана тамак) адиси профессор доктор Метин Өнержиге Эл аралык отоларингология коомдору федерациясы тарабынан 9-13-сентябрь күндөрү Стамбулда өткөрүлгөн Дүйнөлүк отоларингология конгрессинде "Дүйнөлүк алтын медаль" сыйлыгы тапшырылды.
Катышуу жагынан дүйнөдөгү эң ири ЛОР конгресси болгон бул иш-чарада профессор доктор Өнержинин ЛОР илими жаатындагы илимий изилдөөлөрү жана эл аралык билим берүү ишмердүүлүгү бааланып, ага сыйлыкты ыйгаруу бир добуштан чечим кабыл алынды. Ошентип бул сыйлык Түркиядагы окутуучуга биринчи жолу ыйгарылды.
Профессор доктор Метин Өнержи AA кабарчысына берген маегинде Эл аралык отоларингология коомдору федерациясы дүйнө жүзү боюнча ЛОР коомдорун бириктирген башкы уюм экенин айтты.
Федерациянын болжол менен 100 000 мүчөсү бар экенин жана 138 өлкөнүн ассоциациялары уюмга салым кошконун маалымдаган Өнержи, төрт жылда бир өткөрүлүүчү конгресс ар кайсы өлкөлөрдөн келген ЛОР адистерин бириктирерин кошумчалады.
Өнержи сыйлык берүү чечими Түркиядан эч кандай өкүл кирбеген эл аралык комитет тарабынан кабыл алынарын жана комитет сыйлыкты ыйгаруу үчүн илимий изилдөөлөрдү, дүйнөлүк ЛОР илимине кызмат көрсөтүүнү жана билим берүү иш-аракеттерин баалаарын белгиледи.
"Түрк катары мени абдан сыймыктандырды"
Сыйлыкты алуу өзү үчүн чоң сыймык экенин билдирген Өнержи: "Быйылкы медаль менен сыйланганым түрк катары мени абдан сыймыктандырды. Түркияда ЛОР (кулак, мурун жана тамак) илими өтө жогорку деңгээлде. Абдан мыкты кесиптештерибиз бар. Жыйындын илимий комитеттеринде иштеген бардык кесиптештерибиз дүйнөдө кадыр-барктуу кызматтарга ээ адамдар. Түркия дүйнөдө абдан кадыр-барктуу орунга ээ. Мен алардын баары менен сыймыктанам", - деди.
