Украинанын президенти Владимир Зеленский жекшемби күнү Киевдеги жүздөгөн имараттар орусиялык чабуулдардан кийин экинчи күн бою жылытуусуз калгандан кийин, өнөктөштөрүнөн абадан коргонуу боюнча көбүрөөк колдоо сурады.
Орусия дээрлик төрт жылдык согуш учурунда Украинанын энергетикалык инфраструктурасын бутага алууну улантып келет жана Киев өкмөтү бул кыш эң оор кыш экенин айтууда. Айрыкча катуу суукта жүздөгөн орусиялык дрондор жана ракеталар, абадан коргонуу системасын бузуп киргени абалды ого бетер курчутту.
Зеленский Литванын Вильнюс шаарына келгенде сүйлөп жатып: «Ушул аптада эле орустар 1700дөн ашык чабуулчу дрондорду, 1380ден ашык башкарылуучу аба бомбаларын жана 69 ар кандай типтеги ракеталарды учурушту», - деп билдирди.
Зеленский: «Ошондуктан, бизге абадан коргонуу системаларыбыз үчүн күн сайын ракеталар керек. Биз аба мейкиндигибизди коргоону күчөтүү үчүн АКШ жана Европа менен иштешүүнү улантып жатабыз»,-деп кошумчалады
Орусиянын бомбалоолору Киевге өзгөчө катуу сокку уруп, жарым миллион адамды эвакуациялоого аргасыз кылганы кабарланууда.
Киевдин мэри Виталий Кличко: «24-январда Киев шаарына душмандын чабуулунан кийин шаардагы 1676 көп кабаттуу имарат учурда жылытуусуз калды», - деди.
Суук аба ырайы жана кайталанган аба чабуулдары жылытуу жана электр системаларын калыбына келтирүүгө аракет кылган топтордун ишине тоскоолдук кылууда.
Ошол эле учурда, АКШнын ортомчулугу менен жүргүзүлгөн сүйлөшүүлөр, Вашингтондун согушту токтотуу планынын алкагында, ишемби күнү Орусия менен Украинанын ортосунда эч кандай конкреттүү жылыштарсыз аяктады. Ошого карабастан, Зеленский сүйлөшүүлөрдү «конструктивдүү» деп мүнөздөп, тараптар кийинки жумада Абу-Дабиде кайрадан жолугушууга макулдашканын айтты.
