Француз дыйкандары бир жуманын ичинде экинчи жолу тракторлорун Парижге айдап кирип, ЕБ менен Меркосурдун ортосундагы соода келишимине каршы чыгышты, алардын айтымында бул келишим жергиликтүү айыл чарбасын арзан Түштүк Американын импорту менен адилетсиз атаандаштыкка алып келет.
Шейшемби күнү өткөн демонстрацияны Франциянын эң ири дыйкандар бирикмелеринин бири FNSEA уюштурду. ЕБнин эң ири айыл чарба өндүрүүчүсү болгон Франциянын жана башка мүчө мамлекеттердин дыйкандары ЕБ менен Меркосурдун ортосундагы келишим жана көптөгөн жергиликтүү маселелердин себебинен бир нече айдан бери нааразычылык акцияларын өткөрүп келишет.
Париж полициясы демонстрацияга болжол менен 350 трактор катышканын билдирди. Бир трактор кербени Триумфалдык арканын алдында чогулса, экинчиси Франциянын парламентинин имаратына жеттти.
FNSEAнын төрага орун басары жана Париж аймагынан келген дыйкан Дэмиен Греффин: "Меркосур келишими Европа Парламенти өз пикирин билдирбегенине карабастан бекитилди. Бул абал биз Францияда оңой өндүрө турган жана Франциянын айыл чарбасына коюлган стандарттарга жооп бербеген чет элдик товарларды импорттоого алып келет", - деди.
Греффин шейшемби күнү дыйкандар Франция парламентинин алдында нааразычылык акцияларын өткөрөрүн жана 20-январда Страсбургдагы Европа Парламентинде демонстрация өткөрүүнү пландаштыргандарын билдирди.
Жума күнү Европа Биримдигинин көпчүлүк өлкөлөрү Франциянын четке какканына карабастан Меркосур келишимин жактырышты, бул дыйкандардын жана оппозициялык партиялардын өкмөткө болгон кысымын күчөттү.
