АКШнын президенти Дональд Трамп жекшемби күнү Украинанын президенти Владимир Зеленский менен өткөргөн жолугушуудан кийин Орусия менен Украинанын ортосундагы согушту токтотууда олуттуу жылыштарга жетишилгенин билдирди.
"Биз процесстин 95 пайызын карап чыктык. Канча пайыз экенин билбейм, бирок бул согушту токтотууда бир топ ийгиликтерге жетиштик; бул чындыгында Экинчи Дүйнөлүк согуштан берки эң кандуу согуш, балким Экинчи Дүйнөлүк согуштан берки эң чоң согуш", - деди Трамп.
"Эгерде иштер чындап жакшы болсо, балким бир-эки жумага созулат, ал эми жаман болсо узакка созулат", - деди Трамп журналисттерге.
АКШнын президенти ошондой эле согушту токтотуу аракеттеринде бир же эки "өтө татаал маселе" калганын, алардын бири жаңжал учурунда басып алынган аймакка байланыштуу экенин айтты.
Трамп Украинанын согуштан кийинки калыбына келтирүү маселесин Орусиянын президенти Владимир Путин менен талкуулаганын жана Москва жардам берерин, анын ичинде "энергия, электр энергиясы жана башка нерселерди өтө арзан баада камсыз кылаарын" кошумчалады.
Трамп акыркы тынчтык планы боюнча прогресске жетүү үчүн Украина парламентине кайрылуу жасоону сунуштаганын айтып, "бул чындап эле зарылбы же жокпу билбейм, бирок эгерде айына 25 000 адамдын өмүрүн сактап калууга жардам берсе же башка нерсе болсо, мен муну толугу менен жасоого даярмын" деди.
Зеленский
Трамп жана Европа лидерлери менен сүйлөшүүлөрүнөн кийин Зеленский: "Талкууланган бардык маселелерди жыйынтыктоо үчүн командаларыбыздын алдыдагы жумаларда жолугушуу өткөрүү темасында макулдаштык", - деди.
Зеленский ошондой эле Трамп январь айында Вашингтондо украиналык жана башка европалык лидерлерди кабыл алаарын айтты.
Трамп дээрлик төрт жылдан бери уланып келе жаткан жаңжалды токтотуу планын талкуулоо үчүн Зеленскийди Флорида штатынын Палм-Бич шаарындагы Мар-а-Лаго резиденциясында кабыл алды.
Зеленский жекшемби күнү Канадага сапарынан кийин АКШга барды.
Ошол эле учурда Владимир Путиндин атайын өкүлү Кирилл Дмитриев дүйнө жүзү Трамптын тынчтык орнотуу аракеттерин жогору баалаганын айтты.
Орусиянын чет өлкөлөр менен инвестиция жана экономикалык кызматташтык боюнча атайын өкүлү Дмитриев Xте жарыяланган билдирүүсүндө: "Бүткүл дүйнө жүзү президент Трамптын жана анын командасынын тынчтык орнотуу аракеттерин жогору баалоодо", - деп жазды.
