Непалдын президенти Рамчандра Паудел парламентти таркатып, өлкөдө 2026-жылдын 5-мартында шайлоо өткөрүлөрүн жарыялады. Бул билдирүү өлкөдө бир жумадан бери уланып жаткан кандуу зомбулук окуяларынан кийин өлкөнүн биринчи аял премьер-министринин убактылуу дайындалышы менен келди.
Паудел бул тууралуу Жогорку Соттун мурдагы төрайымы Сушила Каркини өлкөнү башкарууга дайындагандан бир нече саат өткөндөн кийин билдирди. Бул дайындоо премьер-министр К.П. Шарма Олинин отставкага кетишине алып келген жана "Z мууну" тарабынан башталган коррупцияга каршы нааразылык акцияларынан кийин ишке ашты.
Президенттик аппараттын билдиргенине караганда Паудел Өкүлдөр палатасын таратты жана шайлоонун 2026 - жыл 5 - март бейшемби күнү өткөрүлүшүнө чечим чыгарды.
Каркинин дайындалышы Паудел, армиянын командири Ашок Раж Сигдел жана Непалда акыркы жылдардагы эң чоң ички башаламандыкка алып келген нааразычылык акцияларынын лидерлеринин ортосунда эки күнгө созулган тыгыз сүйлөшүүлөрдөн кийин ишке ашты. Бул окуяларда кеминде 51 адам каза болуп, 1300дөн ашуун адам жаракат алган.
Непалдын түштүк коңшусу Индия окуялардын тынчтыкты жана туруктуулукка өбөлгө түзөрүн билдирди.
Индиянын премьер-министри Нарендра Моди X социалдык медиа платформасындагы баракчасында: "Непалдын убактылуу өкмөтүнүн премьер-министри кызматын баштаган Сушила Каркини чын жүрөгүмдөн куттуктайм. Индия непалдык бир туугандардын тынчтыгын, прогрессин жана гүлдөп өсүшүн толугу менен колдойт", - деп билдирди.
Өлкө боюнча нааразычылык акциялары социалдык тармактарга тыюу салуу менен козголгон, бирок кийинчерээк бул тыюу салуу жоюлган. Шейшемби күнү Олинин отставкага кетиши менен зомбулук азайды.
Жумушсуздук миллиондогон непалдык жаштарды Жакынкы Чыгыш, Түштүк Корея жана Малайзия сыяктуу башка өлкөлөрдөн жумуш издөөгө түртүүдө. Кытай менен Индиянын ортосунда жайгашкан 30 миллион калктуу өлкө жума күнүнөн тарта кадимки абалына кайта баштады. Дүкөндөр кайрадан ачылып, унаалар жолго чыга баштады жана полиция жуманын башында колдонгон куралдарын таяк менен алмаштырды.
