Израиль Газанын түштүгүндө "коопсуз аймак" деп атаган жерге отурукташкан бир миллионго жакын палестиналык суу тартыштыгына дуушар болуп, үй-бүлөлөр балдары ооруп жатканын айтышууда.
Хан Юнуска жакын Аль-Маваси жээк тилкесинде жер которгон тургундар Анадолу агенттигине берген маегинде таза суусуз күн өткөрүшөрүн, көбүнчө суу жеткирүүчү унаалардын келүүсүн беш-алты күн күтүшкөнүн билдишти.
"Биз аз алганыбызды бөлүшөбүз, бирок бул эч качан жетпейт. Балдар суусап, ооруп, кийимдерибизди да жууй албайбыз, анткени суу жок", - дейт бири-биринен 25 сантиметр аралыкта тигилген чатырларда 1200дөн ашык адам жашаган Нажат лагеринин тургуну.
Дагы бир тургун акыркы жумаларда кризис курчуганын, анткени Израилдин чабуулдары күчөгөндөн кийин Газа шаарынан он миңдеген палестиналыктар качып келгенин айтты. Аймактагы балдар суусуздануудан жана гигиенанын жоктугунан жугуштуу оорулардан жабыркап жатканын эскертти.
Маваси аймагы согуш маалында Израиль армиясы тарабынан бир нече жолу бомбаланды жана "коопсуз аймак" деп белгиленгенине карабастан ал жерге баш калкалаган жүздөгөн жайкын тургундар курман болду. Жер которгон он миңдеген палестиналыктар бул аймакта өтө оор гуманитардык шарттарда жашап жатышат.
Суусуз калтырууну курал катары колдонуп жатат
Газанын Өкмөттүк медиа бюросу июль айында билдиргендей, Израиль күчтөрү 2023-жылдын октябрынан бери кеминде 112 суу толтуруучу станцияны жана 720 кудукту жок кылып, аймактын суу тармагын системалуу түрдө бузган.
Үй-бүлөлөр, аялдар менен балдардын чектелген суу үчүн бош идиштер менен узун кезек күтүп турганын түшүндүрүштү. Ал эми муниципалитеттер жана укук коргоо уюмдары Израилди жай тургундарга каршы суусуздукту курал катары колдонуп жатат деп айыпташууда.
Өткөн айда БУУнун гуманитардык кеңсеси Газадагы үй-бүлөлөрдүн 96% коопсуз суу жеткиликтүүлүгүнө ээ эмес экенин, ал эми палестиналыктардын ондон тогузу ичүүчү сууну таба албаганын билдирди.
БУУнун Палестиналык качкындарга жардам агенттиги (UNRWA) суунун жетишсиздиги жайдын ысыгы менен коштолуп, «катастрофалык» шарттарды жаратканын эскертти.
БУУнун изилдөөчүлөрү жакында Израиль Газада геноцид кылып жатат деген жыйынтыкка келишти. 2023-жылдын октябрынан бери бул жерде 65,300дөн ашуун адам каза болду.
