Израиль камактагы палестиналыктар үчүн өлүм жазасын мыйзамдаштырууга бир кадам жакындады
Мыйзам долбоору камактагы палестиналыктарды өлүм жазасына тартууга уруксат берет жана өкүмдөрдүн 90 күндүн ичинде аткарылышы көздөлүүдө.
Израиль парламентинин Улуттук коопсуздук комитети шейшемби күнү кечинде камактагы палестиналыктарга өлүм жазасын мыйзамдаштыруу боюнча мыйзам долбоорун бекитти.
Мыйзам долбоору мыйзам күчүнө кирерден мурунку акыркы этаптар болгон экинчи жана үчүнчү окуулар үчүн кийинки жумада Кнессетке сунушталат.
Израилдин мамлекеттик KAN телеканалынын маалыматына караганда, комитет биринчи добуш берүүдөн өткөн мыйзам долбооруна айрым өзгөртүүлөрдү киргизип, өлүм жазасы дарга асуу жолу менен аткарылаарын белгиледи.
Өлүм жазасына кесилгендер ыйгарым укуктуу кызматкерлер гана кире ала турган өзүнчө кармоочу жайда кармалат; адвокаттар менен жолугушуулар видео аркылуу гана мүмкүн болот.
Мыйзам долбооруна ылайык, өлүм жазасы өкүм чыгарылгандан кийин 90 күндүн ичинде аткарылышы керек.
Мыйзам долбоорунда прокурордун талабы болбостон да өлүм жазасы бериле алары, чечимди кабыл алуу үчүн бир добуштан шарты талап кылынбай тургандыгы жана жөнөкөй көпчүлүктүн добушу жетиштүү экендиги каралууда.
Апелляциялык арыз жок
Мыйзам долбоорунда өлүм жазасына кесилген палестиналыктар кечирим сурап же апелляцияга кайрыла алышпайт деп айтылууда.
Израилде соттолгон палестиналыктар үчүн өлүм жазасы өмүр бою эркинен ажыратуу менен алмаштырылышы мүмкүн.
Мыйзам долбоорун Израилдин ашынган оңчул Улуттук коопсуздук министри Итамар Бен-Гвир кубаттап, аны "тарыхый күн" деп атады.
Израиль 2023-жылдын октябрь айында Газага каршы согуш баштагандан бери, айрыкча аймактан келген палестиналыктарга карата укук бузуулар бир топ көбөйгөнү кабарланууда.
Адам укуктарын коргоо уюмдары кеңири жайылган ачарчылык, кыйноо, сексуалдык зомбулук жана медициналык жардамдан системалуу түрдө ажыратуулар болуп жатканын билдиришти.