Африка Биримдиги шаршемби күнү согуштан жабыркаган Суданда параллелдүү өкмөттүн жарыяланышы өлкөнү бөлүп-жаруу коркунучун жаратат деп билдирди.
Парамилитардык Ыкчам колдоо күчтөрү (RSF) менен Судан армиясы ортосундагы кагылышуулар, он миңдеген кишинин өлүмүнө жана 12 миллиондон ашуун кишинин жер которуусуна себеп болду. БУУ бул кырдаалды Африка континентинде «окшошу болбогон адамзаттык кризис» деп мүнөздөдү.
Армия менен Ыкчам колдоо күчтөрүнүн ортосундагы согуш башталышта Ыкчам колдоо күчтөрүнүн армияга интеграциясы тууралуу келишпестиктер менен башталган болсо да өлкөнү толугу менен экиге бөлдү. Судан армиясы чыгыш жана түндүк аймактарын көзөмөлгө алып, Ыкчам колдоо күчтөрү Дарфурдун батышын дээрлик толугу менен түштүктүн да айрым аймактарын көзөмөлдөп турат.
Өткөн айда Ыкчам колдоо күчтөрү жана союздаштары Найробиде параллелдүү өкмөт түзүү боюнча "негиздөөчү хартияга" кол коюшту.
Африка Биримдиги билдирүү жасап, бул кадамды айыптап, "мындай аракет өлкөнү бөлүп-жаруу коркунучун жаратат" деп эскертти.
AFP агенттиги көргөн документке кол койгондор козголоңчулар көзөмөлдөгөн аймактарда "тынчтык жана биримдик өкмөтүн" түзүүнү көздөшүүдө.
Март айынын башында Ыкчам колдоо күчтөрү жана союздаштары дагы бир жолу Найробиде "Өткөөл Конституцияга" кол коюшкан.
Африка Биримдиги мүчө мамлекеттерди жана эл аралык коомчулукту "Судан Республикасынын аймагын же анын институттарын бөлүп-жарып башкарууга багытталган эч кандай өкмөттү же параллелдүү түзүмдү тааныбоого" чакырды.
Ошондой эле Африка Биримдиги "Судан Республикасындагы аталган өкмөттү же параллелдүү түзүмдү тааныбайт" деп кошумчалады.
Шейшемби күнү Европа Биримдиги да бир билдирүү жасап параллелдүү өкмөттүн Судан калкынын демократиялык күтүүлөрүнө коркунуч келтиргендигин айтты. Бул билдирүү БУУнун Коопсуздук Кеңешинин өткөн жумадагы билдирүүсүнө окшоп жатат.
