Бразилиянын президенттик администрациясынын маалыматына караганда, өлкө башчысы Лула да Силва АКШ президенти Дональд Трампка кайрылып, анын демилгеси болгон «Тынчтык кеңешине» Палестинаны кошууну жана бул кеңештин ишин Газа тилкеси менен чектөөнү сунуштады.
Дүйшөмбү күнү болгон телефон аркылуу сүйлөшүүдө эки лидер Вашингтондо өтүүчү жолугушууда бул маселени тереңирең талкуулоо боюнча чечим чыгарышты.
50 мүнөттүк сүйлөшүүдө Лула «Тынчтык Кеңешин» Газага гана тиешелүү кылып чектөөнү жана мүчөлөрүнүн катарына Палестинага да орун берилишин талап кылды.
Мындан тышкары, Лула глобалдык башкаруунун келечегине тынчсыздануусун билдирип, Бириккен Улуттар Уюмуна комплекстүү реформа жүргүзүүгө, анын ичинде Коопсуздук Кеңешинин туруктуу мүчөлөрүнүн санын көбөйтүүгө чакырды.
Туруксуз мамилелер
Лула жана Трамп октябрь айындагы алгачкы расмий жолугушуусунан бери тыгыз байланышта боло башташты. Бул сүйлөшүүлөр Бразилия менен Вашингтондун ортосундагы бир топ жылга созулган кастык доорунан кийин мамилелердин жумшарганын айгинелейт.
Жакшырган мамилелердин алкагында, Трам администрациясы Бразилиянын негизги экспорттук товарларын 40 пайыздык бажы алымдарынан бошотту жана бразилиялык жогорку даражалуу сотко карата салынган санкцияларды алып салды.
Эки лидер дүйшөмбү күнкү сүйлөшүүдө Венесуэладагы абалды да талкуулашты. Лула аймакта «тынчтыкка жана туруктуулукка» чакырды. Ушул айдын башында Лула АКШнын Николас Мадурону бийликтен кетирүүгө багытталган Венесуэлага каршы аракеттери «кабыл алынгыс чектен ашып кеткенин» билдирген болчу.
Бразилиянын президенттик администрациясынын маалыматы боюнча, Луланын Вашингтонго сапары февраль айына пландалган Индия жана Түштүк Корея сапарларынан кийин ишке ашат. Иш сапардын так мөөнөтү жакында аныкталат.
