Жекшемби күнү Колумбиянын президенти Густаво Петро АКШлык кесиптеши Дональд Трамптын баңгизат аткезчилиги боюнча айыптоолорун жана коркутууларын четке какты.
АКШнын күчтөрү ишемби күнү эртең менен Каракаска кол салышты. Венесуэланын лидери Николас Мадурону бийликтен кетирүү жана Вашингтондун мунайга бай Түштүк Америка өлкөсүн көзөмөлдөөсүн камсыз кылуу максатында жүргүзүлгөн күтүүсүз рейд учурунда аскердик буталар бомбаланды.
Жекшемби күнү президенттик учактан журналисттерге маалымат берген Трамп Колумбияга каршы да ушул сыяктуу аскердик операциялар жүргүзүлүшү мүмкүн экенин айтып, бул Түштүк Америка өлкөсү "абдан оорулуу" жана "кокаин өндүрүп, аны АКШга сатууну жакшы көргөн оорулуу адам тарабынан башкарылат" деди.
Густаво Петро жөнүндө айтып жатып Трамп: "Анын кокаин заводдору жана кокаин өндүрүүчү жайлары бар, бирок ал муну көпкө чейин жасай албайт" деп кошумчалады.
Колумбияга да Венесуэладагыга окшош аскердик кийлигишүү пландаштырылып жатабы деген суроого республикачылардын лидери: "Бул мага жакшы идеядай сезилет", - деп жооп берди.
Трамп өзүнүн айыптоолорун тастыктаган эч кандай далил келтирген жок бирок: "Эмне үчүн экенин билесиздер, анткени алар көп адамдарды өлтүрүп жатышат", - деди.
Петро айыптоолорду четке кагып, анын аты соттук каттоолордо жок экенин айтты.
X социалдык медиа платформасында Петро: "Мага жалаа жаппаңыз, Трамп мырза",- деп жазды.
Колумбия президенти: "Куралдуу күрөш жана андан кийин Колумбия элинин тынчтык күрөшү менен айырмаланган Латын Америкасынын президентин коркута албайсыз", - деп кошумчалады.
Петро Трамп администрациясынын аймактагы аскердик аракеттерин кескин сындап, Вашингтондун Мадурону «укуктук негизсиз» уурдап кеткенин айтты.
Жекшемби күнү Xтеги башка билдирүүсүндө Петро: "Достор бомбалашпайт", - деп жазган.
Колумбиянын Тышкы иштер министрлиги АКШ президентинин коркутууларын "кабыл алынгыс кийлигишүү" деп мүнөздөп, алардын өлкөсүнө "урмат менен" мамиле кылууну талап кылды.
Колумбия менен АКШ аймактагы маанилүү аскердик жана экономикалык өнөктөштөр болгонуна карабастан алардын ортосундагы мамилелер чыңалган бойдон калууда.
Эки лидер Трамптын экинчи мөөнөтү башталгандан бери тарифтер жана иммиграция саясаты сыяктуу маселелер боюнча үзгүлтүксүз кагылышып келишкен.
