Европа Биримдигинин тышкы саясат боюнча башчысы Кая Каллас Европада сакталган орус активдерин "белгисиз мөөнөткө тоңдуруу" чечимин жарыялады.
Каллас жума күнү кечинде жасаган билдирүүсүндө: "Европа Биримдиги орус активдерин белгисиз мөөнөткө тоңдуруу чечимин кабыл алды. Бул Россия жол ачкан зыянды толук төлөп бермейинче, 210 миллиард еврого чейинки (246 миллиард доллар) орус каражаттардын Европа Биримдигинин аймагында калышын камсыздайт", - деди.
Европа Комиссиясынын төрайымы Урсула фон дер Ляйен бул чечимди кубаттап, мунун Россияга согуш улана берсе, чыгымдар дагы өсө берери жөнүндө "күчтүү сигнал" бергендигин баса белгиледи.
Европа Кеңешинин төрагасы Антонио Коста да ошол эле платформада: "Октябрдагы #EUCO (Европа Кеңешинин жыйыны) саммитинде Европа Биримдигинин лидерлери орус активдеринин Россия согушту токтотуп, келтирген зыянды төлөп бермейинче, орус активдерди тоңдурулган бойдон сактоого убада берген. Бүгүн биз бул убаданы аткардык", - деп билдирди.
Чечим блоктун Украина үчүн же түздөн-түз карыз алуу же Euroclearда санкциялардын алкагында тоңдурулган Россиянын активдерин колдонуу аркылуу 105 миллиард долларды бошотуу максатында кабыл алынды.
Европа Биримдигинде тоңдурулган орус активдеринин негизги сактоочусу Euroclear компаниясынын кожоюну Бельгия план тууралуу күмөн саноолорун билдирип, өлкөнүн жалгыз юридикалык кыйынчылыктарга туш болушунан жана каржылык жоопкерчиликти алышы мүмкүн экендигинен кооптонууда.
Бельгия өкмөтү мүмкүн болгон финансылык жана юридикалык тобокелдиктерди азайтуу жана Euroclearди жакшы коргоо үчүн Европа Биридиги Комиссиясынын алгачкы сунушуна бир нече өзгөртүүлөрдү киргизүүнү талап кылды.
Ошол эле учурда, Россиянын Борбордук банкы жума күнү эртең мененки сааттарда Европа Биримдигинин тоңдурулган активдерди колдонуу пландары мыйзамсыз экенин жана бул сунушка каршы чыгаарын билдирген.
