Палестиналык журналисттер профсоюзу (PJS) Израилдин 2025-жылы сегизи аял 42 палестиналык журналистти камакка алып, палестиналык журналисттерди системалуу түрдө бутага алууну улантканын билдирди.
PJS отчетунда: "Профсоюздун Эркиндиктер комитетинин документация жана мониторинг жыйынтыктарына ылайык, 2025-жылы эркектерди жана аялдарды камтыган жалпысынан 42 палестиналык журналист камакка алынды. Бул камоолор (оккупациядагы) Батыш Шериа, Кудс жана башка оккупациядагы аймактарда, ошондой эле аскердик текшерүү пункттары менен өткөрүү пункттарында, жардам иштерин жүргүзүү учурунда жана үйлөрдү тинтүү учурунда болду", - деп айтылды.
Отчетто 2023 жана 2024-жылдарга салыштырмалуу камоо учурларынын азайышы Израилдин максатын өзгөрткөнүн көрсөтүп турганы баса белгиленди.
Бул өзгөрүү эң таасирдүү журналисттерге басым жасоо, бир эле журналистти кайра-кайра камоо, айыптоосуз же сотсуз административдик камакты колдонуунун кеңейиши жана коркутуу каражаты катары физикалык жана психологиялык зомбулукту колдонуу менен мүнөздөлөт.
PJS ошондой эле комитет журналисттердин аскердик рейддер жана отурукташкандардын кол салууларын чагылдырып жатканда камакка алынган учурларын да документтештиргенин билдирди. Отчетто: "Бул камакка алуулар күбөлөрдү жок кылуу жана чындыктын ачыкка чыгышына жол бербөө үчүн чукул куралга айланганын тастыктайт", - деп айтылды.
Жыныска негизделген зомбулук
2025-жылы ошондой эле Израилдин палестиналык аял журналисттерди камакка алуу, суракка алуу жана депортациялоо аркылуу бутага алуусу кескин көбөйүп, айрым журналисттер кайрадан камакка алынганы байкалды.
Палестиналык журналисттер профсоюзу эл аралык коомчулукту адам укуктары уюмдарын, Бириккен Улуттар Уюмун жана сөз эркиндиги боюнча атайын баяндамачыларды өздөрүнүн юридикалык жана этикалык милдеттерин аткарууга, тез арада кийлигишүүгө жана палестиналык журналисттерге каршы кылмыштар үчүн Израилдин лидерлерин жоопко тартууга чакырды.
Отчетто: "Жыйынтыктап айтканда, Эркиндиктер комитети палестиналык журналисттер бардык кысым жана камоо саясатына карабастан кесиптик жана улуттук ролун аткара берерин, журналисттерди бутага алуу чындыкты жаап-жашырууда же кылмыштарды актоодо ийгиликке жетпей турганын кайталайт" деген сөздөр камтылды.
