Таиланддын жергиликтүү бийликтери шаршемби күнү жогорку ылдамдыктагы темир жол линиясында кран жүргүнчү поездине кулап, поезддин рельстен чыкканын, кеминде 22 адамдын каза болгонун билдиришти.
Накхонратчасима провинциясынын жергиликтүү полиция башчысы Тхатчапон Чиннавонг кырсыктан 22 адам каза болуп, 30дан ашык киши жаракат алганын билдирди.
Окуя жергиликтүү убакыт боюнча саат 09:00 чамасында (02:00 GMT) борбор шаар Бангкоктун түндүк-чыгышындагы Накхонратчасима шаарында, жогорку ылдамдыктагы темир жол тармагын курууда колдонулуп жаткан крандын жүргүнчү поездине кулап түшүүсү менен болгон.
Накхон Ратчасима провинциясынын коомчулук менен байланыш бөлүмүнүн билдирүүсүндө: "Кран поезддин үстүнө кулаган жана поезд рельстен чыгып, өрт чыккан", - деп айтылды.
Жергиликтүү маалымат каражаттары түз эфирде жарыялаган видеолордон куткаруучулардын окуя болгон жерге шашып баратканы, ачык түстөгү поездин капталынан оодарылганын жана урандылардан түтүндүн чыгып жатканын көрүүгө болот.
Нахон Ратчасима провинциясынын башкармалыгы поезд Бангкоктон Убон Ратчатхани провинциясына багыт алганын билдирди. Транспорт министри Пхипхат Ратчакитпракарн поездде 195 адам болгонун жана бийлик өкүлдөрү каза болгондордун күбөлүгүн аныктоо үчүн аракет кылып жатканын айтты.
Кырсыкка себеп болгон кран Таиландда жогорку ылдамдыктагы темир жол тармагын куруу боюнча Пекин тарабынан колдоого алынган 5,4 миллиард долларлык долбоордун курулушунда колдонулуп жаткан. Бул долбоор Кытайдын кеңири "Бир алкак, бир жол" демилгесинин бир бөлүгү болуп, 2028-жылга чейин Бангкокту Кытайдын Куньмин шаарына Лаос аркылуу туташтырууну максат кылууда.
