Европа Кеңешинин төрагасы Антонио Коста согуш учурунда жарандык инфраструктуралык объектилерге кол салуу мыйзамсыз экенин билдирди.

Костанын дүйшөмбү күнкү эскертүүсү АКШнын президенти Дональд Трамп Ормуз кысыгын ачпаса, Ирандагы жарандык инфраструктураны жок кылам деп коркуткандан кийин айтылды.

X баракчасындагы билдирүүсүндө Антонио Коста: "Жарандык инфраструктураны, айрыкча энергетикалык объектилерди бутага алуу мыйзамсыз жана кабыл алынгыс. Бул Орусиянын Украинадагы согушуна да жана бардык согуштарга тиешелүү. Ирандын жарандык калкы Иран режиминин негизги курмандыгы болуп саналат. Эгерде аскердик операция кеңейсе, Иран да негизги курмандыгы болот", - деди.

Коста ошондой эле: "Европа Биримдиги Иранды аймактагы өлкөлөргө кол салууларын дароо токтотууга жана Ормуз кысыгында кеме жүрүүнүн толук эркиндигин калыбына келтирүүгө чакырат. Жакынкы Чыгыштагы беш жумалык согуштан кийин көйгөйдүн түпкү себептерин дипломатиялык чечим аркылуу гана чечүүгө болору айдан ачык", - деп билдирди.