Калифорниянын губернатору Гэвин Ньюсом Лос-Анжелестеги иммиграциялык нааразылык акциялары боюнча талкуу күчөп турган маалда президент Дональд Трампты “көчөлөрдө жарандык согушту баштоого аракет кылууда” деп айыптады.
Ньюсом дүйшөмбү күнү Fox News каналына "Ал тынчтыкты орнотуу үчүн келген жок, согуш үчүн келди. Көчөлөрдө жарандык согушту каалап жатат," деди.
X социалдык тармагында жарыяланган билдирүүсүндө Ньюсом, Трамптын Лос-Анжелеске дагы 2000 Улуттук гвардия аскерин жөнөтүп жатканын укканын айтты.
"Биринчи жөнөтүлгөн 2000 Улуттук гвардиячыбы? Аларга тамак-аш же суу берилген жок. Болгону 300дөйү гана жайгаштырылды, калгандары федералдык имараттарда буйрук күтүп отурушат," деп билдирди. "Бул коомдук коопсуздук үчүн эмес. Бул кооптуу президенттин өзүн көтөрмөлөө аракети".
"Бул жоопкерчиликсиз. Максатсыз. Жана биздин аскерлерге карата сыйлабастык," деп кошумчалады.
700 АКШ деңиз аскери Лос-Анжелеске жөнөтүлөрү жарыялангандан кийин Ньюсом бул чечимди "америкалык баалуулуктарга каршы" деп атады.
Ньюсом Xте" Диктатордук президенттин бурмаланган кыялдарын ишке ашыруу үчүн Американын жеринде өз жарандарына каршы жайгаштырылбашы керек" деди.
"Мен жарандык согушту каалабайм"
Андан соң Трамп көчөлөрдө жарандык согушту каалап жатат деген айыптоолорду четке какты; тескерисинче Ньюсом сыяктуу адамдарга калтырылса жарандык согуш болорун айтты.
Трамп "Жок, бул таптакыр тескерисинче," деди. "Мен жарандык согушту каалабайм. Жарандык согуш Ньюсом сыяктуу адамдарга калтырылса гана болот".
Ак үй буга чейин Лос-Анжелестеги демонстранттарды "радикалдуу солчул жиндилер" деп атап, Ньюсом жана мэр Карен Басстын Трампка ал жактагы иммиграция рейддерин баштаганы үчүн ыраазычылык билдириши керектигин айткан.
Лос-Анжелестеги баш аламандыктар өткөн жума күнү башталган. Иммиграция жана бажы кызматынын (ICE) агенттери шаардагы көптөгөн аймактарга рейд жүргүзүп, АКШда мыйзамсыз жашап жүргөн жүздөгөн адамдарды кармашкан.
Трамптын администрациясы ICE рейддери мыйзамсыз миграцияны токтотуу боюнча президенттин планынын бир бөлүгү катары улантыларын билдирди.
