Түркия Республикасынын Тышкы иштер министрлиги ишемби күнү АКШ менен Израилдин Иранга жасаган биргелешкен чабуулдары менен башталган согуштан жабыркаган Жакынкы Чыгыш өлкөлөрүндөгү түрк жарандарына дипломатиялык өкүлчүлүктөр аркылуу колдоо көрсөтүлүп жатканын жарыялады.

Министрликтин басма сөз катчысы Өнжү Кечели жума күнү X платформасындагы билдирүүсүндө, аймактагы чабуулдардын бутасы болгон өлкөлөрдөгү түрк жарандарын коргоо үчүн зарыл чаралар көрүлгөнүн билдирди.

Кечели Түркиянын чет өлкөлөрдөгү дипломатиялык өкүлчүлүктөрүнүн 7 күн 24 саат бою иштеген ыкчам байланыш линиялары аркылуу кызмат көрсөтүп жатканын баса белгилеп, жарандарды өздөрү жашаган өлкөлөрдөгү түрк өкүлчүлүктөрүнүн кулактандырууларын тыкыр көзөмөлдөп турууга чакырды.

Кечели түрк жарандарынын Ирак, Иран, Израиль, Ливан, Сауд Арабиясы, Сирия, Оман жана Иорданиядан ар кандай транспорттук каттамдар аркылуу чыга алышарын, бул өлкөлөрдөгү дипломатиялык өкүлчүлүктөрдүн коопсуз саякаттарды уюштуруу боюнча багыт берип жатканын белгиледи.

Бахрейн, Катар жана Кувейттен Түркияга түз аба каттамдары жок экенин айткан Кечели, Бириккен Араб Эмирликтеринен (БАЭ) каттамдар сейрек жана өзгөчө учурларда гана ишке ашырылып жатканын билдирди.

Кечели түрк жарандарын төрт өлкөдөн Сауд Арабиясына жана Оманга кургактык аркылуу ташуу үчүн автобус каттамдарын уюштуруу аракеттери жүрүп жатканын, ал жерден  Түркияга уча ала тургандарын билдирди. Бирок автобус каттамдарынын баштатылышы жергиликтүү бийликтердин уруксатынан көз каранды экени кошумчаланды.

Кечели аймактагы шарттар тездик менен өзгөрүп жатканын баса белгилеп, түрк жарандарын барган өлкөлөрдөгү дипломатиялык өкүлчүлүктөрдүн жарыяларын тыкыр көзөмөлдөөгө чакырды.

Бул билдирүү ишембиден бери 1000ден ашык адамдын, анын ичинде Жогорку лидер Али Хаменеинин жана жогорку даражалуу аскер кызматкерлеринин өмүрүн алган Израиль менен АКШнын Иранга карата уланып жаткан чабуулдарынын алкагында жасалды.

Иран болсо буга жооп катары Израиль менен АКШнын аскердик объектилери жайгашкан Булуң өлкөлөрүн дрон жана ракеталар менен бутага алууда.