АКШнын президенти Дональд Трамп Түштүк Кореянын порт шаары Пусанда Кытайдын төрагасы Си Цзиньпин менен жолугушуп, соода чыңалуусун басаңдатуу жана эки тараптуу мамилелерди чыңдоо максатында сүйлөшүүлөрдү өткөрдү.

Бейшемби күнү жолугушуунун башында Трамп журналисттерге эки өлкөнүн ортосундагы соода келишимине жакында кол коюлушу мүмкүн экенин кыйытты.

Кытайдын төрагасы Си Цзиньпин: “Кытайдын өнүгүүсү Америка Кошмо Штаттарын кайрадан улуу кылуу көз карашы менен шайкеш келет,” – деп айтып, эки өлкө “өнөктөш жана дос болушу керектигин” билдирди. “Бул – тарыхтын бизге үйрөткөн сабагы жана чындыктын талабы,” – деп кошумчалады.

Си Цзиньпин эки тараптын ортосундагы соода сүйлөшүүлөрүндө жетишилген "негизги келишимди" жана "дем берүүчү прогрессти" жогору баалап, сүйлөшүүлөр үчүн зарыл шарттар аткарылганын маалымдады. Кытай лидери "Президент мырза сиз менен бирге АКШ-Кытай мамилелеринин бекем пайдубалын куруу үчүн иштөөгө даярмын", - деди.

Си Цзиньпин ошондой эле Трампты “регионалдык көйгөйлөрдү чечүүгө болгон ынтызарлыгы” үчүн мактап, АКШ лидеринин “Газадагы ок атышууну токтотуу келишимине” жана Камбоджа менен Таиланддын чек ара талашындагы тынчтык келишимине кошкон “чоң салымына” көңүл бурду.

“Бүгүнкү дүйнө көптөгөн оор көйгөйлөргө туш болууда. Кытай менен АКШ ири өлкөлөр катары жоопкерчиликти биргелешип көтөрүп, эки өлкөнүн жана бүткүл дүйнөнүн жыргалчылыгы үчүн чоң жана конкреттүү иштерди аткара алат,” – деди.

Трамп Сини “улуу өлкөнүн улуу лидери” деп сыпаттады. “Менимче, бизде узак убакыт бою сонун мамиле болот жана сизди бул жерде көрүү биз үчүн сыймык,” – деген Трамп, жолугушууну “абдан жемиштүү жана позитивдүү” деп мүнөздөдү.

Си дүйнөдөгү эки ири экономиканын “кээде пикир келишпестиктерге туш болушу нормалдуу” экенин айтып, эки тарап тең “достук жана кызматташтыкты сакташы керектигин” билдирди.