Тышкы иштер министри Фидан Сириянын тышкы иштер министри Шейбани менен жолугушуп, биргелешкен маалымат жыйынын өткөрдү.
Фидан өз билдирүүсүндө мындай деп белгиледи:
«Биздин ишибизде Сириянын барган сайын туруктуу болуп баратканын көрүп жатабыз жана өлкөлөрүбүздүн ортосундагы кызматташтыктын тереңдеп баратканын көрүп жатабыз. Бул кырдаал, бизге аймагыбыздын жана өлкөлөрүбүздүн келечеги жагынан Кудайга шүгүр үмүт берет».
«Биздин орток келечегибиз бар»
Фидан сөзүн улантып: «Сириядагы оң кырдаал биздин аймакты коргоо сезими менен ишке ашырылган биргелешкен аракеттерибиздин натыйжасы болуп саналат. Буга чейин мезгил-мезгили менен баса белгилеп келгендей, Түркия менен Сириянын гүлдөп-өнүгүшүн жана туруктуулугун бөлүп кароо мүмкүн эмес. Биздин ортобузда 900 километрден ашык чек ара гана эмес, ошондой эле орток тарых, орток маданият жана орток келечек бириктирет»,-деди.
«Биз Сирия менен болгон мамилелерибизди өнүктүрүп жатабыз»
Министр Фидан: «Биз ошондой эле Сирия менен болгон экономикалык мамилелерибизди жаңы доордун муктаждыктарына ылайык өнүктүрүп жатабыз. Учурда биздин артыкчылыктуу багыттарга бажы процесстерин жеңилдетүү, чек ара өтмөктөрүнүн өткөрүү жөндөмдүүлүгүн жогорулатуу, банк каналдарын ишке киргизүү жана эки тараптуу соода көлөмүбүздү көбөйтүү максатында транспорт инфраструктураларыбызды шайкеш келтирүү кирет. Мамлекеттик мекемелерибиз жана жеке секторубуз да Сирияны калыбына келтирүүгө, анын энергетикалык инфраструктурасын өнүктүрүүгө жана транспорт системасын калыбына келтирүүгө салым кошуу үчүн иштеп жатышат. Бул жагынан аймактык долбоорлор да маанилүү роль ойнойт деп эсептейбиз. Конкреттүү мисал келтирсек, Түркия, Сирия, Иордания жана Сауд Арабиясынын ортосунда баштаган жол жана темир жол байланышы демилгеси бул жагынан өтө маанилүү. Биз бул стратегиялык демилгени мүмкүн болушунча тезирээк ишке ашыруу үчүн иштей баштадык жана лидерлерибиздин чечиминин натыйжасында муну улантабыз», - деп билдирди.
