Венесуэланын президенти Николас Мадуро ишемби күнү АКШнын борбор шаар Каракаска жасаган "олуттуу аскердик чабуулунан" кийин өзгөчө кырдаал жарыялады.
Шаар боюнча учактардын учуп өтүүсүнө окшош үндөр менен коштолгон бир катар жарылуулар угулду.
Мадуро өкмөтү: "Венесуэла АКШнын азыркы администрациясы тарабынан Венесуэланын аймагына жана элине каршы жасалган өтө олуттуу аскердик чабуулду эл аралык коомчулуктун алдында четке кагат жана айыптайт", - деди.
Мадуро өлкөнүн күчтөрүн мобилизациялоого чакырды жана муну "империалисттик чабуул" деп каршылык көрсөттү.
Мадурао ишемби күнкү билдирүүсүндө улуттук эгемендүүлүктү жана коомдук тартипти коргоо үчүн жарандар менен армиянын биргеликте жайгаштырылганын айтып, бул кадамды элдин, армиянын жана полициянын биргелешкен аракети катары сыпаттады.
Өкмөт Бириккен Улуттар Уюмунун Коопсуздук Кеңешине, БУУнун Башкы катчысына, Латын Америкасы жана Кариб деңизи өлкөлөрүнүн коомчулугуна (CELAC) жана Кошулбоо кыймылына расмий түрдө арызданарын; Каракас "кол салуу" деп атаган окуялар үчүн АКШны эл аралык деңгээлде айыптоону жана жоопко тартууну талап кыларын билдирди.
Өзгөчө кырдаал
Мадуро конституцияга жана улуттук коопсуздук мыйзамдарына ылайык, бардык улуттук коргонуу пландары ишке киргизилгенин жарыялады. Ошондой эле ал өкмөткө өзгөчө ыйгарым укуктарды берген жана өлкө боюнча «тышкы башаламандык» абалын жарыялаган жарлыкка кол койду.
Ал бул чаралар жарандардын укуктарын коргоо, мамлекеттик мекемелердин ишин үзгүлтүксүз камсыз кылуу жана зарыл болсо, Венесуэланы куралдуу каршылык көрсөтүүгө даярдоо максатында кабыл алынганын айтты.
Президент ошондой эле Улуттук комплекстүү коргонуу командирлигине дароо өлкө боюнча жайгашууну буйруду жана аймактык, муниципалдык коргонуу органдарына кечиктирилбестен мобилизацияланууну тапшырды.
Мадуро БУУнун Уставынын 51-беренесине таянуу менен Венесуэла өзүн-өзү коргоого мыйзамдуу укугу бар экенин белгиледи жана дүйнө өлкөлөрүнүн өкмөттөрүн жана элдерин тилектештикке чакырды. Ал сөзүн маркум президент Уго Чавестин биримдикке, күрөшкө жана жеңишке чакырган сөздөрү менен аяктады.
«Чабуулдардын артында АКШ турат»
Ишемби күнү Венесуэланын борбору Каракаска жасалган бир катар чабуулдардын артында АКШ армиясы турганын америкалык маалымат каражаттары кабарлашты.
Ак үй жана Пентагон шаардагы жардыруулар жана учактар тууралуу билдирүүлөр боюнча расмий түшүндүрмө бере элек.
Бирок CBS News жана Fox News сыяктуу америкалык медиа каражаттары Трамптын администрациясындагы атын атагысы келбеген расмий өкүлдөр бул окуяларга АКШ күчтөрүнүн катыштыгы бар экенин тастыкташканын билдиришти.
CBS кабарчысы Женнифер Жейкобс X (мурдагы Twitter) платформасында Трамптын администрациясынын өкүлдөрү ишемби күнү эртең менен Каракас үстүндөгү жардыруулар жана учактар тууралуу маалыматтардан кабардар экенин жазды.
Reuters агенттигинин комментарий берүү өтүнүчүнө Ак үй жана Пентагон дароо жооп берген жок. Бирок Reuters агенттигине атын атагысы келбеген америкалык бир аткаминер АКШ Венесуэланын ичинде чабуулдарды уюштурганын айтты. Ал кол салуулар тууралуу кошумча маалымат берген жок.
