Түркиянын авиация жана коргонуу тармагындагы гигант компаниясы Baykar менен Италиянын алдыңкы коргонуу фирмасы Leonardo, орто класстагы алгачкы учкучсуз учуучу аппараттарын (УУА/ИХА) чыгарууга даярданып жатышат. Жаңы аппараттын ушул жылдын апрель айында таанытылышы күтүлүүдө.
Түркия–Италия коргоо өнөктөштүгү Европада жасалган учкучсуз учуучу аппараттарды өндүрүү аракеттерин ылдамдатты.
Leonardo компаниясынын башкы директору Роберто Чинголани «Анадолу» агенттигине берген маегинде, эки компаниянын ортосундагы биргелешкен долбоор мурда белгиленген «жол картасына» ылайык ийгиликтүү жүрүп жатканын билдирди.
Бейшемби күнү инвесторлор үчүн өткөрүлгөн иш-чарада сөз сүйлөгөн Чинголани, бир нече жүз килограмм жүк көтөрө алган орто класстагы учкучсуз учуучу аппараттардын апрель айында Италиядагы Ронки-дей-Леджонари (Ronchi dei Legionari) ишканасында чыгарыла баштай турганын айтты. Компания башка объектилерде да өндүрүшкө карата даярдыктарды улантып жатканын билдирди.
Чинголани аппараттардын Европадагы жогорку суроо-талапты канааттандыруу үчүн Италияда сертификацияланаарын айтты.
Чинголани Baykar менен Leonardo компаниялары бирин-бири толуктаган күчтүү кызматташтыкта экенин баса белгилеп, Baykar аба платформасын иштеп чыгып, ал эми Leonardo чалгындоо системаларын жана тармакка тиешелүү технологиялар менен камсыз кылаарын белгиледи.
Чинголани ошондой эле биргелешип чыгарылган учкучсуз учуучу аппараттардын 2025-жылдын ноябрында жарыяланган "Микеланджелонун куполу" абадан коргонуу системасында роль ойной аларын айтты. Бул системанын биринчи сыноосу жылдын аягына чейин Украинада өткөрүлүшү күтүлүүдө.
Leonardo-Baykar өнөктөштүгү иштеп чыккан аппараттардын бул абадан коргонуу калканына интеграциялануу мүмкүнчүлүгү да каралууда.
