Филиппиндин түштүгүндөгү Басилан провинциясынын жээгинде 350дөн ашык жүргүнчүнү ташыган паромдун чөгүп кетишинен кеминде 15 адам каза болду.
GMA News Online маалымдагандай, дагы 43 адам дайынсыз болууда.
M/V Trisha Kerstin 3 парому Сулу провинциясындагы Жоло аралына бара жаткан.
Жээк күзөт кызматкерлери жергиликтүү маалымат каражаттарына 316 адам куткарылганын жана издөө-куткаруу иштери уланып жатканын билдиришти.
Басилан аралынын губернатору Мужив Хатаман Facebook баракчасына бөлүшкөн Минданаодогу Изабела портунан тартылган видеолордо, аман калгандар катерлерден түшүрүлгөнү, айрымдары жылуулук жууркандарына оролуп, кээ бирлери носилка менен ташылып жатканы көрсөтүлдү.
Хатаман DZBB радиосуна аман калгандардын көпчүлүгүнүн абалы жакшы экенин, бирок айрым улгайган жүргүнчүлөрдүн медициналык жардамга муктаж экенин айтты. Куткаруу иштери уланып жатканда, Хатаман жетекчилер жүргүнчүлөрдүн тизмесин тактап жатканын кошумчалады.
7000ден ашык аралдан турган Филиппин деңиз коопсуздугу боюнча начар көрсөткүчтөргө ээ: жыл сайын паром кырсыктарынан көптөгөн адамдар каза болушат.
