Хамас Палестина эли өз жерин башкарууга укуктуу экенин жана Израилдин оккупациясы уланана берсе куралдарын таштабай тургандарын билдирди.

Хамастын диаспора бөлүмдөрүнүн башчысы Халед Мешал, сырттан эч кандай саясий системанын аларга таңууланбай турганын айтты.

Хамас жекшемби күнү Халед Мешалдын Египеттин борбору Каирде өткөрүлгөн иш-чарада сүйлөгөн сөзүнүн видеосун бөлүштү. Бул иш-чара Израиль менен туткундарды алмашуу жана ок атышууну токтотуу келишиминин алкагында эркин кое берилип сүргүнгө айдалган палестиналык туткундарды урматтоо үчүн уюштурулган.

“Газа өз элине гана таандык; Газанын да, Батыш Шерианын эли да өз мекенин башка жерге алмаштырбайт”, - деди.

‘Палестинага альтернатива жок’

Мешал Израилдин курчоосундагы Газа жана оккупацияланган Батыш Шериадагы палестиналыктар өз жерлерин бекем коргой тургандарын баса белгиледи.

“Палестинага альтернатива жок, Палестина – бул биздин мекенибиз. Араб жана Ислам өлкөлөрүнө болгон урмат-сыйыбыз туруктуу бойдон калса да эч нерсе мекенибизди алмаштыра албайт”, - деди ал.

Мешал Палестинаны башкаруу укугу анын элине гана таандык экенин жана сырттан эч кандай саясий системанын таңууланбай турганын билдирди.

Палестинанын туш болгон кыйынчылыктарын жеңүүдө улуттук биримдиктин маанилүүлүгүн баса белгилеп, Араб дүйнөсүн палестин элин колдоого чакырды.

Мешал Газада элди ачарчылыкка дуушар кылуу аркылуу сүргүнгө мажбурлоо аракеттери жүрүп жатканын айтты.

“Газанын келечеги, башкаруусу, куралдары жана каршылык көрсөтүү күчү коркунучта турат”, - деди.