Индия менен Бутан дүйшөмбү күнү эки өлкөнү байланыштырган биринчи чек ара темир жол линиясын кура турганын жарыялашты.
454 миллион долларлык долбоордун төрт жылдын ичинде бүтөрү күтүлүүдө.
Индиянын Тышкы иштер министрлигинин катчысы Викрам Мисри Бутандын негизги соода өнөктөшү Индиянын Гималайдагы бул королдук өлкөнүн инфраструктурасын жана экономикасын модернизациялоодо “маанилүү роль ойнойт” деп билдирди.
Индиянын темир жол министри Ашвини Вайшнав темир жол долбоорунун "Бутан элине чоң пайда алып келерин" айтты.
"Бүткүл аймак кошулат. Бүгүнкү күндө бир нече күн талап кылынган жүк ташуу азыр бир нече сааттын ичинде ишке ашат", - деди Вайшнав.
34,56 миллиард рупийге (390 миллион доллар) курула турган 69 чакырымдык (43 миль) темир жол линиясы Индиянын түндүк-чыгышындагы Кокраджар шаарын Бутандагы 10 миң калктуу Гелепу шаарчасы менен байланыштырат.
"Түштүк Азиянын борбору"
5,77 миллиард рупийге (65 миллион доллар) курула турган экинчи 20 чакырымдык темир жол линиясы Бутандын түндүк-батышындагы өнөр жай борбору Самце менен Индиянын чыгышындагы Банархат менен байланыштырат.
Кичинекей жана деңиз жээги болбогон, калкы 800 миңден ашпаган Бутан Кытай менен Индиянын ортосунда жайгашкан. Бул өлкө өсүү түшүнүгүнө караганда Улуттук Бактылуулукка артыкчылык бергени менен белгилүү.
Буга карабастан Бутан Гелепу аймагын чет элдик инвестиция жана туристтерди тартуу үчүн экономикалык аймак катары өнүктүрүүнү көздөйт. Бул өнүгүүдө жаңы темир жол негизги ролду ойноодо.
"Бул аймак Бутанды Түштүк Азия жана Түштүк-Чыгыш Азия менен байланыштырган экономикалык борбор катары иштелип жатат",- деди Мисри.
Вайшнав жаңы темир жол линияларында электр транспорту болоорун жана мүмкүн болушунча экологиялык жактан таза болоорун белгиледи.
