Пакистанда түндүк-батыштагы Хайбер-Пахтунхва провинциясында, Ооганстан менен чек арага жакын жерде, жанкечтилик жардыруудан кеминде 16 аскер каза болуп, ондогон адамдар, анын ичинде жай тургундар жаракат алышты деп жергиликтүү маалымат каражаттары кабарлашты.
Жардыруу Мир Али аймагындагы Хади базарында армиянын кербенине жасалган деп билдирет жергиликтүү Khyber Chronicles маалымат агенттиги коопсуздук булактарына таянып.
Коопсуздук кызматкерлери билдиргендей, бул чабуулду жанкечти жардыргыч заттарды 22-Фронттук күчтөр полкунун бомба зыянсыздандыруучу унаасынын жанында жардыруу менен ишке ашырган.
“Жанкечти жардыргыч заттар жүктөлгөн унааны аскер кербенине кагып, жардырды”, - деди Хайбер-Пахтунхва провинциясынын Түндүк Вазиристан районундагы жергиликтүү өкмөт өкүлү, аты-жөнүн ачыкка чыгарбоону суранып, анткени ал маалымат каражаттарына сүйлөөгө уруксат алган эмес.
Ал 16 аскер каза болгонун, мурдагы 13 адам өлүмү тууралуу маалыматты жаңыртып билдирди.
“Жардыруу эки үйдүн чатырларынын кулашына алып келип, алты баланы жарадар кылды”, - деп билдирди райондук полиция кызматкери AFP агенттигине.
Бул чабуул үчүн “Техрик-и-Талибан Пакистан” (ТТП) террордук уюмунун бир бөлүгү жоопкерчиликти өзүнө алды.
Жардыруудан кеминде 24 киши, анын ичинде 14 жай тургун жаракат алган.
Бул чабуул Хайбер-Пахтунхва провинциясындагы акыркы айлардагы коопсуздук күчтөрүнө жасалган эң кандуу бир күндүк чабуулдардын бири болуп калды.
Азырынча Пакистан армиясы бул чабуул боюнча расмий билдирүү жасай элек.
Вазиристан, Хайбер жана Куррам райондорундагы күчтөргө жасалган акыркы чабуулдардан кийин Пакистан армиясы бул аймактарда чалгындоо операцияларын күчөттү.
Исламабад “Техрик-и-Талибан Пакистан” (ТТП) террорчуларын Ооганстанда жайгашкан деп шектенишип, Пакистанда террордук чабуулдарды алар уюштуруп жатат деп айыптап келет, бирок Кабул мындай чабуулдар өз аймагынан уюштурулуп жатат деген дооматтарды четке кагат.
