Президентке караштуу Улуттук инвестициялык агенттиктин уюштуруусунда өткөн форумга инвесторлор, бизнес чөйрөсүнүн өкүлдөрү, эл аралык каржы институттары жана эксперттерден турган 600дөн ашык адам катышты.
Форумдун ачылышында сөз сүйлөгөн Кыргыз Республикасынын Министрлер Кабинетинин Төрагасынын биринчи орун басары Данияр Амангелдиев, ШКУнун 2025-2026-жылдардагы төрагалыгы учурунда ишкердик байланыштарды бекемдөө жана инфраструктуралык тоскоолдуктарды жоюу боюнча бир катар чараларды ишке ашырып жатканын айтты.
ШКУнун глобалдык экономикадагы стратегиялык ролун белгилеген Амангелдиев буларды айтты: «ШКУга мүчө мамлекеттер 3,5 миллиарддан ашык калкы жана 33 триллион долларлык жалпы ИДПсы (Ички дүйнөлүк продукт) менен 10 өлкөдөн куралып, дүйнөлүк экономиканын эң ири борборлорунун бирин түзөт. Ошол эле учурда өлкөлөрүб.з дүйнөлүк айыл чарба өндүрүшүнүн 38 пайызын камсыздайт. Акыркы 4 жылда Кыргызстан менен ШКУ өлкөлөрүнүн ортосундагы соода жүгүртүүнүн көлөмү 2 эседен ашык өстү. Туруктуу өнүгүү үчүн санариптик соода, жашыл энергетика, транспорт, логистика жана инфраструктура сыяктуу тармактарга көңүл бурууну сунуштайбыз».
«Ар бир өлкөнүн өзүнчө күчтүү жактары бар»
Кыргызстандын Соода-өнөр жай палатасынын президенти Темир Сариев уюм биргелешкен гүлдөп-өнүгүүнүн кыймылдаткычы болушу керектигин белгилеп, мүчө өлкөлөрдүн потенциалына көңүлдөрдү бурду.
Кытайдын технология, Россиянын энергетика, ал эми Казакстан менен Кыргызстандын транзиттик коридор сыяктуу артыкчылыктарга ээ экенин айткан Сариев: «Кыргызстан сиздердин идеяларыңыздарга, инвестицияларыңыздарга жана бизнесиңиздерге ачык», — деп чакыруу салды.
ШКУнун башкы катчысынын орун басары Пяо Яньфань уюмдун аймактык тынчтыкка, туруктуулукка жана элдердин бакубаттуулугуна кошкон салымдарын эске салып, форумдун ишкерлер үчүн конкреттүү келишимдер менен жыйынтыкталышын каалады.
Форумдун алкагында, меморандумдар менен ниет каттары да камтылган, жалпы суммасы 150 миллион долларлык12 инвестициялык жана соода келишимине кол коюлду.
