Москва жума күнү берген билдирүүсүндө Жакынкы Чыгыштагы согуш мунай берүүнү чектеп жаткан бир мезгилде глобалдык энергетика рыногунун орус мунайы болбостон “туруктуу бойдон кала албай турганын” белгилеп, Вашингтонду киргизилген санкцияларды жоюуга чакырды.
Америка Кошмо Штаттары Украинадагы согуштан улам Россияга киргизилген мунай санкцияларынын айрымдарын жеңилдетти; бул абал Батыш өнөктөштөрүнүн нааразычылыгын жаратты, алар Вашингтонду Украинадагы кагылышуу бешинчи жылына кирип жатканда чектөөлөрдү улантууга чакырышкан.
АКШ менен Израилдин Иранга жасаган чабуулдары жана Тегерандын Булуң аймагындагы жооп кайтаруу соккулары стратегиялык жактан маанилүү Ормуз кысыгындагы ишмердүүлүктү дээрлик токтотуп, дүйнөлүк энергия жана транспорт секторлорун башаламандыкка учуратты. АКШнын Каржы министрлиги бейшемби күнү билдиргендей, өлкөлөр мунай тартыштыгын жоюуга жана бааны түшүрүүгө аракет кылып жаткан учурда Россиянын деңиздеги мунайын сатууга убактылуу уруксат берилгенин жарыялады.
Мунай баалары бул аптада бир баррель баасы болжол менен 120 долларга жогорулап, пандемиядан бери эң жогорку деңгээлге жетти.
G7 каршылыгы
Россиянын экономика боюнча өкүлү Кирилл Дмитриев жума күнү билдирүү жасап, Вашингтондун санкцияларды жоюушу "барган сайын качууга мүмкүн" болбой баратканын айтты. Дмитриев Telegram аркылуу берген билдирүүсүндө: "Америка Кошмо Штаттары чындыгында эле белгилүү эле нерсени жарыялап жатат: Россиянын мунайы болбостон дүйнөлүк энергетикалык рынок туруктуу боло албайт. Күчөп жаткан энергетикалык кризистин ортосунда, Брюсселдеги бюрократиянын айрымдарынын каршылыгына карабастан, Россиянын энергетикалык ресурстарына коюлган чектөөлөрдү мындан ары жумшартуудан кутула албастыгы байкалууда",- деди.
Бирок G7 төрагалыгын аткарып жаткан Франциянын президенти Эммануэль Макрон Ормуз кысыгынын жабылышы Россияга каршы санкцияларды жоюуну актабай турганын айтты. Макрон Россия боюнча позициянын өзгөрбөй турганын жана Украина боюнча аракеттердин уланарын баса белгиледи.
Россиянын мунайына уруксат берилди
АКШнын Каржы министрлиги бейшемби күнү атайын лицензия жарыялады. Ага ылайык, 12-мартка чейин кемелерге жүктөлгөн орус чийки мунайын жана мунай продуктуларын жеткирүүгө жана сатууга 11-апрелге чейин уруксат берилди. Бул кадам Вашингтон өткөн жумада деңизде калып калган орус мунайын Индияга сатууга убактылуу уруксат бергенден кийин жасалды.
Каржы министри Скотт Бессент мунун «тар чөйрөдөгү жана кыска мөөнөттүү чара» экенин жана орус өкмөтүнө олуттуу каржылык пайда алып келбей турганын айтты.
