Politico гезитинин бул темадан кабары бар алты кишиге таянып жазганына караганда, АКШ президенти Дональд Трамп мусулман лидерлерин Израилдин басып алуусундагы Батыш Шерианы аннексиялоого жол бербейм деп ишендирди.
Трамп бул убадасын Нью-Йоркто БУУнун Башкы Ассамблеясынын алкагында өткөн жабык эшик артындагы саммитте билдирди. Саммитте араб жана мусулман лидерлери Вашингтонду Израилдин Газадагы согушун токтотууга артыкчылык берүүгө чакырышты.
Politico маалыматына ылайык, Трамптын командасы согушту токтотуу боюнча администрациясынын планын, анын ичинде аннекцияга каршы милдеттенмени камтыган документти да тараткан.
Катардын эмири Шейх Тамим бин Хамад Аль Тани тарабынан уюштурулган саммитке Түркиянын президенти Режеп Тайип Эрдоган, Иорданиянын падышасы Абдулла II, Индонезиянын президенти Прабово Субианто, Пакистандын премьер-министри Шахбаз Шариф, Египеттин премьер-министри Мустафа Мадбули, БАЭнин тышкы иштер министри Шейх Абдулла бин Заид Аль Нахаян жана Сауд Арабиянын тышкы иштер министри ханзаада Файсал бин Фархан катышты.
‘Адилеттүү жана туруктуу тынчтыкты орнотуу’
Рияд тарабынан жарыяланган биргелешкен билдирүүдө лидерлер Газадагы согушту токтотуу “адилеттүү жана туруктуу тынчтыкка жетүүнүн биринчи кадамы” экенин белгилеп “чыдагыс гуманитардык кырдаал” жана жай тургундардын оор жоготуулары тууралуу эскертишти.
Газадагы саламаттыкты сактоо органдары 2023-жылдын октябрынан бери 65,000ден ашуун палестиналык каза болгонун билдиришти.
Палестиналыктардын мажбурлап көчүрүлүшүн четке каккан лидерлер, жер которгон тургундардын кайтып келишин жана гуманитардык жардамдын тоскоолдуксуз жетүүсүн камсыздай турган чукул ок атышпоону талап кылышты.
Ошондой эле алар Батыш Шериа жана Кудстагы ыйык жерлерди камтыган туруктуу жол картасын түзүү, Палестина башкаруучулугунда реформаларды жүргүзүү, Газаны араб өлкөлөрү менен ИКУнун колдоосу астында комплекстүү реконструкциялоо планын түзүүгө чакырышты.
БУУнун иликтөөчүлөрү жакында Израиль Газада геноцид жасоодо деген жыйынтыкка келишкен. Бул аймакта көп жылдык бомбалоодон кийин ачарчылык жана кыйроо өкүм сүрүүдө.
