Жапония Израилдин Палестинада эки мамлекеттүү чечимге жолтоо боло турган кадамдарды жасаган учурда "жаңы чараларды жана жооп кайтарууну" караштырарын эскертти.
Нью-Йоркто өткөн БУУнун Палестина темалуу конференциясында сүйлөгөн сөзүндө тышкы иштер министри Такеши Ивая: «Жапония Палестина элинин өз көз карандысыз мамлекетин түзүү каалоосун толук колдойт»,-деди.
«Эгер Израиль эки мамлекеттүү чечимди ишке ашырууга тоскоол боло турган кадамдарды жасаса, Жапония жаңы чараларды киргизүүгө жана жооп кайтарууга аргасыз болот», – деп кошумчалады.
Ал Токионун эки мамлекеттүү чечимди көптөн бери колдоп келе жатканын баса белгилеп, “Өлкөм үчүн Палестинаны таануу маселеси "качан ишке ашары" маанилүү” деди.
Австралия, Канада, Улуу Британия, Франция, Бельгия жана башка көптөгөн өлкөлөр акыркы апталарда Палестинаны расмий түрдө тааныганына карабастан Жапония Палестинаны таануу чакырыктарын азырынча четке кагып келет.
Оор кырдаал
Ивая «Газадагы гуманитардык кризистин курчушу, Батыш Жээкте мыйзамсыз отурукташуу аракеттеринин кеңейиши жана аннексияга карай кадамдар таптакыр кабыл алынгыс», – деди.
«Жапония бул аракеттерди катуу айыптайт жана Израилди мындай бир тараптуу аракеттерди дароо токтотууга чакырат» деп кошумчалады. Кырдаалдын «эки мамлекеттүү чечимдин негиздерине коркунуч туудурган оор жана кооптуу чекке жеткенин» эскертти.
Оккупацияланган Батыш Жээктеги кайра куруу иштерине Жапониянын «байкалаарлык салымдарына» көңүл бурган Ивая Токионун «Палестинанын Израиль менен тынчтыкта, туруктуу жашоо мүмкүнчүлүгүнө ээ болушу үчүн мындан да олуттуу сүйлөшүүлөрдү улантарын» айтты.
Өткөн жылдын июль айында Жапония биринчи жолу Батыш Жээктеги палестиналыктарга каршы зомбулукка катышкан төрт израилдик отурукташууга санкция киргизген.
Конференция БУУнун Башкы Ассамблеясынын 80-сессиясынын ачылышынан бир күн мурун жана БУУнун иликтөөчүлөрү Израиль Газада геноцид жасоодо деген жыйынтыкка келгенден бир нече күн өткөндөн кийин өттү. 2023-жылдын октябрынан бери Газада 65,300дөн ашуун палестиналык каза тапты.
