Ирандын Ислам революциясынын сакчылар корпусу (ИРСК) өлкөнүн борбордук бөлүгүндө АКШнын заманбап F-35 согуштук учагын атып түшүргөнүн ырастады.

Жума күнү Ирандын мамлекеттик телеканалдары учкучту тирүү кармап, бийлик органдарына өткөрүп берген жарандарга атайын акчалай сыйлык берилерин жарыялады.

АКШнын расмий өкүлү Рейтер агенттигине АКШнын согуштук учагы Ирандын аба мейкиндигинен  атып түшүрүлгөнүн жана экипаждын изделип жатканын билдирди.

Аты аталбаган расмий өкүл кошумча маалымат берген жок. Пентагон жана АКШнын Борбордук командачылыгы азырынча бул маселе боюнча комментарий бере элек.

Axios маалымат агенттиги дагы АКШнын согуштук учагын Ирандын  атып түшүргөнүн билдирди.

Axios басылмасы билдиргендей, эгер бул маалымат расмий тастыкталса, анда бул окуя согуш башталгандан бери АКШ учагынын "душман" тарабынан атып түшүрүлгөн биринчи учур болот. Буга чейин Иран бир нече учакты атып түшүргөнүн айтып келген, бирок F-35 үлгүсүндөгү учак боюнча бул экинчи билдирүү.

Ирандын мамлекеттик маалымат каражаттары кырсык болгон жерден учактын сыныктарын жана катапульттук отургучту көрсөткөн видеолорду жарыялады. Бирок аскердик эксперттер бул сүрөттөрдөгү сыныктар F-35 эмес, F-15 истребителине таандык болушу мүмкүн деген алгачкы корутундуларын беришүүдө.

"Фарс" маалымат агенттиги аскердик күчтөр абадан коргонуу тутуму менен атылган учактын учкучун табуу үчүн масштабдуу операция баштаганын кабарлады.

Маалыматтарга караганда, АКШ учкучтарды куткаруу үчүн аймакка бир нече Black Hawk тик учактарын жана Hercules 130 (C-130) учагын жөнөткөн. Ирандын "Тасним" агенттиги америкалыктардын бул куткаруу аракети ийгиликсиз аяктаганын ырастоодо.

Ирандын мамлекеттик маалымат каражаттары учактын сыныктарын жана атылуучу отургучтардын бирин табышканын билдирди. Ирандын маалымат каражаттары ошондой эле АКШ күчтөрүнүн атып түшүрүлгөн   F-35 согуштук учагынын учкучун издөө жана куткаруу иштери үчүн бир нече Black Hawk тик учактарын жана Hercules 130 учагын жөнөткөнүн кабарлады.

Учак Ирандын борбордук бөлүгүндөгү Кохгилуйе жана Буйерахмед провинцияларынын аймагында кулаганы болжолдонууда. Жергиликтүү бийлик тургундарды учкучтарды издөөгө көмөктөшүүгө чакырып, "америкалык аскерди" колго түшүргөндөргө сыйлык убада кылды.

Эскерте кетсек, 28-февралда Израиль менен АКШ Иранга сокку ургандан кийин Жакынкы Чыгыштагы абал кескин курчуду. Иран буга жооп катары Израилдеги жана аймактагы АКШ базалары жайгашкан өлкөлөрдөгү объекттерге ракеталык чабуулдарды жасап келет.