Украинада бийликтеги партиянын парламенттик фракция жетекчиси парламенттин аскердик абалда президенттик шайлоо өткөрүү мүмкүнчүлүгүн карап чыгуу үчүн жумушчу топ түзгөнүн жарыялады.
Украина президенти Владимир Зеленскийдин "Эл кызматчысы" партиясынын парламенттик фракция жетекчиси Давыд Арахамия дүйшөмбү күнү Telegram баракчасындагы билдирүүсүндө талкуулар Жогорку Раданын (Украина парламентинин) Мамлекеттик бийликти уюштуруу, жергиликтүү өз алдынча башкаруу, аймактык өнүгүү жана шаар куруу боюнча комитети менен биргеликте жүргүзүлөрүн билдирди.
Арахамия бардык парламенттик фракциялардын, Украинанын Борбордук шайлоо комиссиясынын жана шайлоо маселелерине тиешеси бар жарандык коомдук уюмдардын өкүлдөрү процесске катышаарын кошумчалап, "Жыйындын күнү жана убактысы жакында жарыяланат" деди.
Зеленский ушул айдын башында коопсуздук жана укуктук шарттар аткарылса, 60-90 күндүн ичинде президенттик шайлоо өткөрүүгө "даяр" экенин билдирип, АКШ менен Европа өнөктөштөрүн согуш учурундагы добуш берүү үчүн зарыл шарттарды түзүүгө жардам берүүгө чакырган.
Украина лидеринин бул кадамы АКШнын президенти Дональд Трамптын Politico басылмасына берген маегинен кийин болду. Трамп Украинанын шайлоо өткөрүүгө убакыты келгенин жактап, Киев "согушту шайлоодон качуу үчүн колдонуп жатат" деген жана узакка созулган кечиктирүү Украинанын демократиясына зыян келтирерин эскерткен.
Зеленский Киев саясий артыкчылык алуу үчүн шайлоодон качууда деген дооматтарды четке кагып, согуштун уланышы "ким кызматта турганына эч кандай тиешеси жок" деп айтып, мыйзам чыгаруучулардан согуш учурунда шайлоо өткөрүүгө мүмкүндүк берүүчү укуктук өзгөртүүлөрдү даярдоону суранганын кошумчалады.
