Трамп: АКШнын аскерлери Иранды азырынча толук жок кыла элек
Трамптын бул сөздөрү Иран согушу боюнча элге кайрылуусунан кийин айтылды. Ал өз сөзүндө АКШ Иранга кол салууларын алдыдагы эки-үч жума бою улантаарын билдирди.
АКШнын президенти Дональд Трамп Ирандагы маанилүү инфраструктурага көбүрөөк кол салуулар болушу мүмкүн экенин айтты.
Бейшемби күнү Трамп Truth Social социалдык медиа платформасында: "Биздин куралдуу күчтөр дүйнөдөгү эң чоң жана эң күчтүү күч болуп саналат (албетте!) Иранда калганын жок кыла элек", - деди жана "Андан кийин көпүрөлөрдү, андан соң электр станцияларын! Жаңы режимдин жетекчилиги эмне кылуу керектигин билет жана муну тез арада жасашы керек!" деп кошумчалады.
Бул сөздөрдү 28-февралда башталган "Эпикалык каар" операциясы тууралуу элге кайрылуусунан бир күн өткөндөн кийин айтты.
Ал өз сөзүндө: "Аларга алдыдагы эки-үч жуманын ичинде өтө катуу сокку урабыз. Биз аларды татыктуу болгон таш дооруна кайтарабыз", - деди.
Буга чейин 100дөн ашык эл аралык укук адистери АКШнын Иранга жасаган чабуулдары согуш кылмыштары катары каралышы мүмкүн деп эскертишкен.
Адистер кат жарыялап: "АКШнын салык төлөөчүлөрүнө күн сайын 1 миллиард доллардан 2 миллиард долларга чейин чыгым келтирген бул согуш аймактагы жарандарга олуттуу зыян келтирип, Жакынкы Чыгышта жүздөгөн жарандардын өлүмүнө, олуттуу экологиялык жана экономикалык зыяндарды алып келүүдө", - деп жазышты.