Кытайдын коргонуу чыгымдары 2025-жылы 7,2 пайызга көбөйөт, бул өткөн жылдагы көрсөткүч менен бирдей, деп шаршемби күнү AFP агенттиги расмий документке шилтеме берип билдирди.
Бул өсүү Кытайдын куралдуу күчтөрүнүн тез модернизацияланышы жана Америка Кошмо Штаттары менен стратегиялык атаандаштыктын тереңдеши менен байланыштуу.
Кытай дүйнөдөгү экинчи чоң аскердик бюджетке ээ, бирок анын негизги стратегиялык атаандашы болгон АКШдан кыйла эле артта.
“Быйыл Кытай коргонууга 1,78 триллион юань (245,7 миллиард доллар) сарптайт — бул АКШнын бюджетинин үчтөн биринен да аз”, деп өкмөттүн отчетунда айтылат.
Кытайдын аскердик бюджети ондогон жылдар бою анын экономикалык өнүгүүсүнө жараша өсүп келет.
Жаңы коргонуу бюджети Кытайдын аймактык таасиринин өсүшүн жана Тайвань менен биригүү саясатын чагылдырат.
Тайвань менен биригүү
Шаршемби күнү Бээжин Тайвань менен биригүү аракетин "чечкиндүү түрдө алдыга жылдырарын" билдирди.
Улуттук мыйзам чыгаруу органына караштуу талкууга берилген өкмөттүн иш отчетуна ылайык, өлкө Тайвань кысыгындагы экономикалык жана маданий алмашууларды жана кызматташууну илгерилетүү үчүн институттарды жана саясаттарды жакшыртат жана кысыктын эки тарабындагы интеграцияланган өнүгүүнү алдыга жылдырып, "эки тараптагы кытай элинин жыргалчылыгын" жакшыртат.
Кытай Тайванды өзүнүн бөлүнүп кеткен провинциясы деп эсептейт, ал эми Тайбэй өзүнүн көз карандысыздыгын талап кылат.
Ошондой эле Кытай "бир тараптуу аракеттерге жана протекционизмдин бардык түрлөрүнө каршы чыгып, эл аралык адилеттүүлүктү жана калыстыкты коргойт", деп иш отчетунда кошумчаланды.
"Өлкө тынчтыкты көздөгөн көз карандысыз тышкы саясатты жана тынч өнүгүү жолун карманууну улантат", деп айтылат анда.
