Кудс губернаторлугунан жасалган билдирүүдө, Израилдин муниципалитети Кафр Акаб менен Каландиянын ортосунда узак убакыттан бери UNRWA’нын алкагында иш алып барган кесиптик билим берүү комплекси жайгашкан жерге жаңы "билим берүү комплексин" курууну пландап жатканы белгиленди.
Билдирүүдө аталган пландын оккупация астындагы Чыгыш Кудста БУУнун мекемесинин ишмердүүлүгүнө бут тосууну көздөгөн Израилдин иш-аракеттеринин бир бөлүгү экени айтылды.
Пландын саясий жана жайгашуу жагына көңүл бурулган билдирүүдө, ал 82 акр аянтты камтый турганы баса белгиленди.
Израиль муниципалитети бул планды "Кафр Акаб аймагындагы класс жана окуу имараттарынын жетишсиздигин жоюу" шылтоосу менен коргоп жатканы, бирок негизги максат UNRWAга таандык кесиптик билим берүү комплексин жоюу жана бул уюмдун аймактагы ишмердүүлүгүн толугу менен токтотуу экени билдирилди.
Палестиналык качкындарга билим берүү жана кесиптик кызматтарды көрсөткөн БУУнун мекемесин бутага алган бул пландын артында олуттуу тобокелчиликтер бар экени эскертилген билдирүүдө, Израилдин мекемелери UNRWAга караштуу имараттардын ордун басып алышы мүмкүн экендигине көңүл бурулду.
Билдирүүдө 2017-жылы Иерусалимдин Жебел-Мукеббер районунда ушундай чечим кабыл алынганы, бирок бекитилгенине бир нече жыл болгонуна карабастан, билим берүү комплексинин курулушунда олуттуу жылыш болбогону айтылды.
Шейх Жаррах районунда "Салихиййе" үй-бүлөсү 2022-жылы "билим берүү мекемелери курулат" деген шылтоо менен үйлөрүнөн жана жумуш орундарынан кууп чыгарылганы, бирок долбоордун курулушу ушул күнгө чейин баштала электиги белгиленди.
Аната шаарында да ушундай эле кырдаал катталган, ал жерде бир нече жыл мурун бекитилген палестиналык окуучулар үчүн пландаштырылган мектеп долбооруна уруксат берилген эмес жана курулуш баштала элек.
Палестина аймактарында уланып жаткан билим берүү кризиси үчүн Израилдин дискриминация жана кайдыгерлик саясаты жооптуу экени белгиленген билдирүүдө, Тель-Авив администрациясы учурдагы кемчиликти жоюунун ордуна, муну жерлерди тартып алуу жана мүлктөрдү конфискациялоо үчүн курал катары колдонуп жатканы айтылды.
UNRWAнын маалыматтарына ылайык, Каландия комплексинде 15-19 жаштагы болжол менен 350 окуучу окуйт.
Маалыматтарга караганда, сөз болуп жаткан жер Израилдин 1967-жылы Батыш Шерианы басып алганга чейин Иордания тарабынан мекемеге бөлүнүп берилген.
