Төмөнкү басымдагы системанын таасири астында катуу жааган жамгырдан улам шейшемби күнү Газада оорукана жана миңдеген чатырды суу каптады.

Газадагы ШИфа ооруканасынын айрым бөлүктөрүнө өзгөчө кабыл алуу жана тез жардам бөлүмдөрүнө жамгыр суусу кирип, кызмат көрсөтүүлөр үзгүлтүккө учурады.

Газадагы эң ири медициналык комплекс болгон Шифа ооруканасы эки жылга созулган геноцид учурунда көп жолу Израилдин соккусуна учурап, катуу зыян тарткан.

Ок атышууну токтотуудан кийин, Газадагы Саламаттыкты сактоо министрлигинин мекемелерди оңдоо аракеттери Израилдин керектүү жабдуулардын кирүүсүнө тоскоолдук кылышынан улам үзгүлтүккө учурады.

Көргөн күбөлөр дүйшөмбү күнү кечинде аймакта болгон катуу шамалдан улам жер которгон миңдеген адамдын чатырларын суу каптап жана учканын айтышты.

Палестиналык качкын Халед Абдел Азиз: «Чатырыбызга катуу шамалдын тийген үнү менен ойгондук. Чатырды бекем кармап турууга аракет кылдык, бирок шамал аны кулатып, бардык буюмдарыбыз учуп кетти. Аялым жана балдарым менен тышта калдык, жамгырдын астындабыз. Баш калкалай турган жер жок», - деди.

Күбөлөрдүн айтымында, жүздөгөн палестиналык Израиль армиясы талкалаган имараттардын айрым бөлүктөрүнүн астында жамгырдан баш калкалоо издешүүдө.

Өзгөчө Газанын жарандык коргонуусунун өкүлү Махмуд Басал Израилдин геноциди учурунда жарым-жартылай талкаланган миңдеген үйдүн жамгыр жана катуу шамалдан улам качан болсо да кулап калуу коркунучунда турганын эскертти.

Басал: «Бул үйлөр жашай турган жери жок жүз миңдеген палестиналыктардын өмүрүнө олуттуу коркунуч туудурат. Дүйнөнү бир нече жолу эскерттик, бирок эч кандай майнап чыккан жок», - деди.

Өткөн аптада Газада Байрон бороонунан кеминде 14 адам каза болду. 27 000ден ашык жер которгон адамдын чатырын суу каптап, сел агызып же катуу шамалдан улам талкаланды; андан тышкары Газа боюнча 13 имарат кулады.

Жарандык коргонуунун маалыматы боюнча, учурда Газа боюнча жер которгон адамдардын лагерлеринде болжол менен 250 000 үй-бүлө жашап жатат; көбү чатырларда суук жана суу ташкындарына туш болууда.

10-октябрда ок атышууну токтотуу күчүнө киргенине карабастан Газадагы жашоо шарттары жакшырган жок, анткени Израиль жардам ташыган унаалардын кирүүсүнө катуу чектөөлөрдү киргизүүнү улантууда; бул келишимдин гуманитардык протоколун бузуу болуп саналат.

2023-жылдын октябрынан бери Израилдин Газага кол салууларында көпчүлүгү балдар менен аялдар болгон 70 600дөн ашык адамды өлтүрүп, 171 100дөн ашык адамды жарадар кылды; ок атышууну токтотууга карабастан кол салуулар уланууда.