Түркиянын түндүк-батышындагы байыркы Троя шаарында археологдор 4500 жылдык алтындан жасалган брошь жана сейрек кездешүүчү нефрит ташын табышты. Бул тууралуу өлкөнүн Маданият жана туризм министри Мехмет Нури Эрсой билдирди.
Министр Эрсой ишемби күнү социалдык тармактар аркылуу бул табылга тууралуу жарыялап, Эрте коло дооруна таандык болгон брошту “акыркы кылымдагы эң маанилүү табылгалардын бири” деп атады. Ал бул сыяктуу брошь дүйнөдө болгону үчөө гана бар экенин жана алардын ичинен эң жакшы сакталып калганын белгиледи.
Бул табылгалар Чанаккале шаарындагы Троя музейинде көрсөтүлөт
Троя II катмарынан табылган бул артефакттар болжол менен б.з.ч. 2500-жылдарга таандык. Министрлик бул ачылыш Троя II мезгилинин башталышы боюнча көптөн бери уланып келе жаткан талаш-тартыштарга жооп табууга жардам берерин билдирди.
Эрсой нефрит ташы 4500 жыл мурун кымбат баалуу буюм катары бааланганын белгиледи. Бул эки табылга, ошондой эле ошол эле катмардан табылган коло төөнөгүч менен бирге Чанаккаледеги Троя музейинде көрсөтүлөт.
160 жылдан ашуун убакыттан бери археологдор Гомердин “Илиада” жана “Одиссея” эпосторунда даңазаланган байыркы Троя шаарын изилдеп келишет. Бул шаар 1998-жылдан бери ЮНЕСКОнун Дүйнөлүк мурастар тизмесине киргизилген жана ал дүйнөдөгү эң маанилүү археологиялык жайлардын бири катары эсептелет. Троя шаары байыркы Анадолунун шаар курулушу жана соодасы тууралуу маалымат берет.
Министрлик бул табылгалар “тарых жашалган жерде тарыхка жарык чачат” деген принципке ылайык, табылган жеринде көрсөтүлөрүн билдирди.
