Польшанын тышкы иштер министри Радослав Сикорский өткөн жумада орус дрондору Польшанын аба мейкиндигине кирип, НАТОнун реакциясын толук масштабдуу согушту баштабастан текшерүүнү көздөгөнүн айтты.
«Кызыгы, алардын баары жараксыз болуп чыкты, бул мага Орусия бизди согуш баштабастан сынап көрүүнү көздөгөнүн көрсөтөт», – деп Сикорский жекшемби күнү Британиянын The Guardian гезитине билдирди.
Ал болжол менен 19 дрондун үч-төртөөсү гана атып түшүрүлгөнүн, Польша коргонуу системасы даяр эмес болгон деген сындоолорду четке какты.
«Дрондор өз максаттарына жеткен жок, мүлккө аз гана зыян келтирилди, эч ким жабыркаган жок. Эгер бул Украинада болгондо, украин аныктамалары боюнча бул 100 пайыз ийгилик деп эсептелмек», – деди Сикорский. Ал эгерде курмандыктар болгондо, Варшаванын реакциясы «алда канча катуу» болмоктугун кошумчалады.
Ката эмес
Министр АКШ президенти Дональд Трамптын бул окуя «ката болушу мүмкүн» деген сунушун да четке какты.
«Бир-эки дрон максатынан тайып кетиши мүмкүн деп ишенсеңиз болот, бирок бир түндө, жети саат ичинде 19 ката кетти дегенге ишенбейм», – деди ал.
Орусия Польшага атайылап чабуул койгонун четке какты.
Сикорский X социалдык тармагында жазып, Москваны карама-каршы билдирүүлөрдү таратып жатат деп айыптады: «Орус өкмөтү орус дрондору Польша аба мейкиндигин ката менен бузганын айтса, БУУдагы орус элчиси орус дрондору Польшага физикалык жактан жетпейт деп ырастоодо. Орусиянын кайсы калпына ишенишибиз керек?»
НАТО жума күнү келечектеги дрон чабуулдарынан коргонуу үчүн чыгыш фронтундагы учактарын көбөйтөөрүн билдирди.
