Венесуэланын президенти Николас Мадуро жаңы жылдык маегинде өлкөсүнүн мунай секторунда АКШнын инвестицияларына ачык экенин, баңгизат аткезчилигине каршы күрөшүүдө кызматташууга жана Вашингтон менен олуттуу сүйлөшүүлөрдү жүргүзүүгө даяр экенин билдирди.
Жыл башында Мексиканын "La Jornada" гезитинде жарыяланган жана Венесуэланын мамлекеттик телеканалында көрсөтүлгөн испаниялык журналист менен болгон жылдык маегинде Мадуро: "Фактылар ачык болгондон кийин биз олуттуу сүйлөшө башташыбыз керек", - деди.
Мадуро: "Эгерде алар баңгизат аткезчилигине каршы күрөшүү боюнча олуттуу келишим тууралуу сүйлөшүүнү каалап жатса биз даярбыз. Эгерде алар Венесуэланын мунайын кааласа, Chevron сыяктуу АКШнын инвестицияларын каалаган убакта, каалаган жерде жана каалагандай кабыл алууга даярбыз", - деди.
Бул билдирүүлөр АКШнын президенти Дональд Трамптын санкцияларды кеңейтүүсү, аймактагы АКШнын аскердик күчтөрүн көбөйтүүсү жана Тынч океан менен Кариб деңизиндеги баңгизат аткезчилигине байланышы бар деп шектелген кемелерге 20дан ашык чабуул жасалганына карабастан, Мадуронун Трамп менен диалогго даяр экени тууралуу буга чейинки айткандарын тастыктады.
«Кынтыксыз модель»
Мадуро сөз болуп жаткан кысымдар Венесуэланын эбегейсиз зор жаратылыш ресурстарын көзөмөлдөөгө багытталганын билдирди. Президент АКШнын максаты Венесуэланын жаратылыш байлыгын, биринчи кезекте мунайын, алтынын жана сейрек кездешүүчү жер элементтерин басып алуу экенин айтты.
АКШнын президенти Дональд Трамп ушул аптада АКШнын күчтөрү Венесуэлада баңгизат аткезчилиги үчүн колдонулган деп болжолдонгон пирске сокку урганын жарыялады, бирок кол салуунун жайгашкан жери тууралуу маалымат берген жок.
Мадуро маегинде кол салууну тастыктаган жок, бирок бул маселе алдыдагы күндөрү каралышы мүмкүн экенин билдирди. Мадуро: «Элди, армияны жана полицияны бириктирген биздин улуттук коргонуу системабыз өлкөнүн аймактык бүтүндүгүн жана тынчтыгын камсыз кылды жана камсыз кылууну улантат», - деди.
Венесуэлада бийликтеги партия менен байланышта болгон бир блогдо кол салуунун Ла Гуахира жарым аралындагы жээк тилкесинин кууш тилкесинде болгондугун ортого салды.
Мадуро аймак аркылуу аткезчилик жол менен ташылган кокаиндин коңшу Колумбиядан келгенин айтып, Венесуэланын баңгизат аткезчилигине каршы күрөшүүдө «кынтыксыз модель» экендигин кошумчалады.
