Украинанын Коргоо министри Рустем Умеров жекшемби күнү Сауд Арабияда АКШ делегациясы менен өткөрүлгөн сүйлөшүүлөрдү «конструктивдүү жана маңыздуу» деп мүнөздөп, негизинен энергетика секторуна басым жасалганын кабарлады.
«Секторго байланыштуу критикалык темаларды өзгөчө энергетика тармагын талкууладык», – деп жазды Умеров социалдык тармактагы билдирүүсүндө.
Умеров жетектеген украин делегациясы, АКШ президенти Дональд Трамптын Орусия менен үч жылдык согушту токтотуу аракетинин алкагында дипломатиялык сүйлөшүүлөргө катышты.
АКШнын атайын өкүлү Стив Виткофф Сауд Арабиядагы критикалык сүйлөшүүлөрдүн алдында оптимисттик көз карашын айтып, Орусиянын президенти Владимир Путин да согуштун бүтүшүн каалайт деген ишенимин билдирди.
«Мен анын тынчтыкты каалап жатканын сезем», – деди Виткофф жекшемби күнү Fox News каналына.
Украина менен Орусиянын ортосунда ок атышууну жарым-жартылай токтотуу мүмкүнчүлүгү Сауд Арабияда украин жетекчилери менен өткөрүлгөн сүйлөшүүлөрдө талкууланды. Дүйшөмбү күнү Эр-Риядда АКШ менен Орусиянын расмий өкүлдөрү да өз-өзүнчө жолугушат.
«Менимче, дүйшөмбү күнү Сауд Арабияда өзгөчө Кара деңиздеги кемелерге байланыштуу ок атышууну токтотуу боюнча чыныгы жылыштарды көрөсүздөр. Андан кийин бул табигый түрдө толук масштабдуу ок атышууну токтотууга багыт болот», – деди Виткофф.
Өткөн жумада Путин украиналык энергетикалык объектилерге чабуул жасоону убактылуу токтотууга макул болгон, бирок Трамп сунуштаган 30 күндүк толук ок атышууну токтотуу келишимин колдоодон баш тарткан. Украина Трамптын 30 күндүк ок атышпоо сунушун кабыл алган.
