Булактардын маалыматына караганда, Түркиянын тышкы иштер министри Хакан Фидан АКШ менен Израилдин Иранга жасаган чабуулдары жана Тегерандын жооп кайтаруу чаралары учурунда жигердүү дипломатиялык сүйлөшүүлөрдү жүргүзүүдө.
Фидан 28-февралда АКШ менен Израилдин Иранга каршы ишке ашырган биргелешкен чабуулдарынан кийин окуялардын өнүгүшүнө баа берүү жана чабуулдарды токтотуу үчүн таштала турган кадамдарды талкуулоо максатында Иран, Ирак, Сауд Арабиясы, Катар, Сирия, Египет жана Индонезиянын тышкы иштер министрлери менен сүйлөштү.
Ошол эле күнү Фидан аймактык чабуулдарды талкуулоо үчүн Бириккен Араб Эмирликтери (БАЭ), Испания жана Венгриядагы кесиптештери менен өзүнчө телефон аркылуу сүйлөшүүлөрдү өткөрдү.
Европа Биримдигинин тышкы саясат боюнча башчысы Кая Каллас менен да сүйлөшкөн Хакан Фидан, аймактагы чыңалуунун күчөшүнө баа берип, тараптар менен кагылышууну токтотууга багытталган дипломатиялык демилгелерди талкуулады.
Жекшемби күнү Фидан Ирандын тышкы иштер министри Аббас Аракчи менен Ирандагы акыркы кырдаал тууралуу пикир алышты, ошондой эле аймактык кризисти чечүү аракеттеринин алкагында Омандын тышкы иштер министри Сайид Бадр Хамад Аль-Бусаиди менен да сүйлөштү.
Тышкы иштер министри Фидан дүйшөмбү күнү Азербайжандын тышкы иштер министри Жейхун Байрамов менен телефон аркылуу сүйлөшүп, аймактагы кагылышууну токтотуу аракеттерин талкуулады. Мындан тышкары, Болгариянын тышкы иштер министри Надежда Нейнски менен да сүйлөшүп, аймактык кагылышуулардын өз ара таасирин карап чыкты.
Андан кийин Фидан Франциянын тышкы иштер министри Жан-Ноэль Барро менен сүйлөшүү өткөрүп аймактагы окуяларды кеңири талкуулады. Тараптар ошондой эле чыңалууну басаңдатуу жана чабуулдарды токтотуу үчүн таштала турган конкреттүү кадамдарды карап чыгышты.
Мындан сырткары, Фидан иорданиялык кесиптеши Айман Сафади менен да телефон аркылуу сүйлөштү. Сүйлөшүүдө чабуулдарды токтотууга, чыңалууну азайтууга жана тиешелүү тараптар менен дипломатиялык аракеттерди күчөтүүгө көңүл бурган Фидан менен Сафади аймактагы акыркы окуялардын саясий, коопсуздук жана гуманитардык аспектилерин талкуулашты.
