Президент Режеп Таййип Эрдоган, АКШнын президенти Дональд Трамп жана мусулман лидерлери менен Газа маселеси боюнча жолугушуунун «абдан жемиштүү жана оң» өткөнүн белгилеп, жыйынтыктын пайдалуу болушуна үмүттөнөөрүн билдирди.

Нью-Йорктогу Түрк үйүнүн алдында журналисттерге берген маегинде Эрдоган: "Биз жаңы эле абдан жемиштүү жана позитивдүү жолугушууну аяктадык. Мен канааттандым. Жыйынтыгы пайдалуу болсун," — деди.

Эки лидер Бириккен Улуттар Уюмунун Башкы ассамблеясынын 80-сессиясынын алкагында БУУнун башкы кеңсесинде Газа боюнча аймактык жыйынга катышты.

Трамп менен өткөрүлгөн саммит тынчтыкка жана жайкын тургундарды коргоого багытталган конкреттүү кадамдарга алып келиши мүмкүнбү деген суроого Эрдоган жакында биргелешкен декларация жарыяланарын айтты. "Акыркы декларация балким жакын арада жарыяланат. Трамп жана Тамимдин [Катар эмири Шейх Тамим бин Хамад аль Тани] билдирүүлөрү менен бүгүнкү жолугушуунун жыйынтыгы такталат," — деди.

Орток көз караштар

Трамп ошондой эле журналисттерге жыйындын «абдан ийгиликтүү» өткөнүн айтып, мусулмандардын көпчүлүк бөлүгүн түзгөн мамлекеттердин катышуусуна басым жасады.

"Газа боюнча абдан жакшы жолугушуу өткөрдүк" деген Трамп, "Израилден башка бардык негизги актерлор катышкан абдан ийгиликтүү жолугушуу болду. Бирок алдыда Израиль менен жолугушуу бар жана Газа темасында бир чечим таба аларыбызга ишенем. Негизги лидерлер менен абдан жемиштүү жолугушуу өткөрдүк",-деди.

Расмий өкүлдөр жабык эшик артында өткөн жыйындын жыйынтыгы тууралуу кошумча маалымат берген жок.

Эрдоган бул сүйлөшүүлөр палестиналыктар үчүн маанилүү жыйынтыктарды алып келет деп үмүттөнөрүн айтып, аймактык оюнчулардын катышуусу маанилүү экенин белгиледи. Трамп болсо келечектеги сүйлөшүүлөргө Израилди да кошо алаарын билдирди.