Эрдоган: «Түркия COP31ди кабыл алууга жана Газаны кайра курууга жардам берүүгө даяр»
Президент Режеп Таййип Эрдоган G20 саммитиндеги билдирүүсүндө: «Палестина элин колдоого болгон чечкиндүүлүгүбүз жана даярдыгыбыз ар дайымкыдай эле уланууда», - деди.
Түштүк Африканын Йоханнесбург шаарында өткөн G20 саммитинде лидерлерге кайрылган президент Режеп Таййип Эрдоган Түркия келерки жылдын ноябрь айында Бириккен Улуттар Уюмунун климаттын өзгөрүшү боюнча COP31 конференциясын өткөрүүгө даяр экенин билдирди.
Австралия өзүнүн өтүнүчүн кайтарып алгандан кийин, Түркия келерки жылы Жер Ортолук деңизинин курорттук шаары Анталияда COP31 климаттык саммитин өткөрүүгө даярданып жатат.
Ишембидеги сөзүндө президент Эрдоган Түркиянын энергетикалык максаттарын баса белгилеп, 2035-жылга чейин күн жана шамал энергиясынын кубаттуулугун төрт эсеге көбөйтүүнү көздөп жатканын жана Түркиянын энергетикалык аралашмасындагы кайра жаралуучу энергиянын үлүшү быйыл 60 пайыздан ашканын билдирди.
Газа маселесине кайрылган Эрдоган өткөн айда жетишилген ок атышууну токтотуунун дүйнөлүк туруктуулук үчүн өтө маанилүүлүгүн баса белгиледи.
Эрдоган:«Бириккен Улуттар Уюмунун маалыматтарына ылайык, Израилдин келтирген зыяны Палестинанын өнүгүү аракеттерин 70 жылга артка тартты», - деди.
Эрдоган Түркия туруктуу ок атышууну токтотууну колдоого жана Палестина аймактарын калыбына келтирүүгө салым кошууга чечкиндүүлүгүн кошумчалады.
Президент Режеп Тайип Эрдоган: «Ар дайымкыдай эле, биз Палестина элин колдоого чечкиндүү жана даярбыз», - деди.
Түштүк Африканын Йоханнесбург шаарында дүйнөдөгү эң актуалдуу маселелерди талкуулоого багытталган эки күндүк лидерлердин саммити өтүүдө.